Veriu i Kosovës, situatë e qetë, persona të maskuar te Lagjja e Boshnjakëve

Mëngjesi i sotëm në veri të Kosovës raportohet i qetë ndonëse mësohet se te Lagjja e Boshnjakëve vazhdojnë të qëndrojnë persona të maskuar.

Për veprimet e personave të maskuar dje kanë raportuar pranë Policisë së Kosovës edhe disa gazetarë, disa prej të cilëve janë sulmuar pak metra nga Lagjja e Boshnjakëve, te Shkolla Teknike!

Duke raportuar për situatën në veri, RTK thekson se shihet prani e karabinierëve italianë.

Mbrëmë në veri, një pjesëtarë i Policisë së Kosovës është lënduar lehtë dhe janë shkaktuar dëme të konsiderueshme materiale në veturën e policisë, thuhet në njoftimin e policisë së Kosovës.

Ndërkohë Asociacioni i Gazetarëve të Kosovës, AGK, ka reaguar duke dënuar sulmin e djeshëm ndaj një ekipi të gazetarëve të Kallxo.com në veri të Mitrovicës.

Sipas komunikatës për media, ekipi i kësaj medie është sulmuar nga një grup i maskuar i serbëve, në afërsi të Shkollës Teknike.

Kallxo.com ka thënë se Dy gazetarët kanë arritur të shpëtojnë pa lëndime fizike dhe janë larguar me shpejtësi në drejtim të zonave tjera të Mitrovicës, raporton Kallxo.com, ndërsa sulmuesi ka goditur me grushte makinën dhe me mjete të forta janë hedhur edhe nga pjesëtarët e grupit.

AGK kërkon nga Policia e Kosovës që të kujdeset për të ofruar kushtet e duhura të sigurisë për raportimin e gazetarëve nga kjo pjesë e vendit.