Vetëm 19 vjeç, Mbape theu sot rekordin e të madhit Pele

Përveçse kaloi në çerekfinale dhe theu Argjentinën e Mesit, Franca gjeti sot një lider, Kilian Mbapen.

Ndonëse është vetëm 19 vjeç Mbape luajti një ndeshje të madhe, duke treguar se PSG-ja bëri mirë që pagoi 160 milionë euro për shërbimet e tij.

Golin e parë në një Kupë Bote, Mbape e shënoi ndaj Perusë, duke u bërë kështu lojtari më i ri që shënon gol për Francën në një Botëror pas Trezeges.

Me dygolëshin e shënuar sot Mbape arrin rekordin e Peles, duke qenë futbollisti i dytë adoleshent, që shënon një dygolësh në një Botëror.

Pele e bënte këtë në vitin 1958, duke shënuar 2 gola në finalen e Botërorit ndaj Suedisë, aty ku Brazili fitonte me rezultatin e thellë 5-2.

Pas brezit të Zidane, Trezege e Henri që i dha Francës Kupën e Botës në vitin 1998, “Les Blues” duket se kanë rigjetur një tjetër brez të artë, ndër të cilët më premtuesi mbetet padyshim Mbape.