VIDEO/ Alibeaj-deputetëve të PS: A keni frikë nga burgu, po bëheni hajdutë me Edi Ramë…

Deputetët e PD-së kërkuan sot në Komisionin e Ligjeve nxjerrjen jashtë kalendarit të punimeve të Kuvendit të pr/ligjit për Teatrin, përmes të cilit i hapet rrugë shembjes së godinës aktuale dhe ndërtimit të rreth 6 kullave shumëkatëshe nga kompania Fusha.

Deputeti Enkelej Alibeaj duke iu drejtuar deputetëve të PS-së tha se ato po përdoren nga Edi Rama, Erjon Veliaj dhe kompania Fusha për të vjedhur mbi 200 milionë euro.

“A e keni frikë burgun ju apo jo? Po pse doni që në CV tuaj të shkruani se jeni hajdut bashkë me Edi Ramën dhe Erjon Veliajn? Sa është pjesa që merrni ju? Mos u bëni pjesë e kësaj vjedhjeje, pasi është faturë e madhe ligjore dhe politikë. Po konsumoni vepra të qarta penale, nuk ju shpëton fakti se jeni deputet, as që po shpërndahet kolektive tek deputetët”, tha Alibeaj.

Në vijim ai kërkoi heqjen nga rendi i ditës së pr/ligjit në fjalë, duke i bërë thirrje ligjvënësve socialist që të respektojnë betimin që kanë bërë kur morën mandatin e deputetit për të respektuar Kushtetutën, Rregulloren e Kuvendit dhe interesin publik.

“Mos u bëni vegël e Edi Ramës, mos u bëni bashkëhajdut me Kryeministrin dhe Kryetarin e Bashkisë”, tha Alibeaj, duke shtuar se po konsumoni vepra penale.

Ndërsa, Ulsi Manja, deputet i PS-së, i tha Alibeajt se po shkel Kodin Etik. “Po shkelni kodin etik, nuk mund të akuzoni kolegët me fjalor rruge. Ju keni mbrojt vrasës, ju s’keni moral, keni mbrojtur vrasës”, tha Manja.