Video/ Forcat Detare të SHBA, provë me bombë 18.143 kg pranë avionmbajtëses, shkaktohet tërmet 3.9 ballë

Forcat Detare të Shteteve të Bashkuara kanë zhvilluar disa prova qëndrueshmërie në kushte lufte me bomba shumë të fuqishme, ku anija e forcave detare ishte pranë vendit të shpërthimit i cili ka shkaktuar dhe tërmet.

Vetë Forcat Detare të SHBA kanë publikuar një video ku shihet bomba prej 18.143 kilogramëve që shpërthen në afërsi të bregdetit të Floridas, dhe ndonëse shpërthimi ishte shumë i fuqishëm, avionmbajtësja “Gerald R. Ford” i rezistoi me sukses shpërthimit.

Se sa i fuqishëm ishte shpërthimi tregon dhe fakti se kishte shkaktuar dhe një tërmet me magnitudë prej 3.9 të shkallës Rihter, rreth 160 kilometra nga vendi i shpërthimit.

 Ndryshe, shpërthimi i fuqishëm është kryer nën ujë dhe është prova e parë me një bombë kaq të fuqishme, ndërkohë paralajmërohet se prova të ngjashme të qëndrueshmërisë do të vijojnë.