Vuçiç: Nëse Danubi bie edhe 30 centimetra, kemi mbaruar

Presidenti serb Aleksandar Vuçiç tha se Serbia po përballet me probleme serioze për shkak të nxehtësisë ekstreme dhe niveleve të ulëta të ujit në Danub, duke paralajmëruar se një rënie e mëtejshme e nivelit të lumit mund të shkaktojë vështirësi të mëdha.

“Nëse bie edhe 30 centimetra të tjera, mbarojmë. Në vendet që kanë centrale bërthamore që varen nga nivelet e ujit, problemi është edhe më i madh. Sidoqoftë, ka probleme të panumërta, dhe më i madhi është në Vojvodinë, veçanërisht sepse atje nuk ra shi. Më hëngrën të gjallë për shkak të kësaj. Nuk ka probleme të tilla në pjesë të tjera të vendit, vetëm në Vojvodinë, veçanërisht në pjesë të Banatit,” tha Vuçiç gjatë një interviste për Nish TV duke e pranuar se Serbia po përballet me “10 ditë ferri” ndërsa paralajmëroi për konsum rekord të energjisë elektrike.

“Dhe tani po vjen koha më e keqe, 10 ditë ferri. Dhe mos harroni se tani po konsumojmë shumë energji elektrike, sikur të ishte Shën Nikolla. Jemi prishur të gjithë, askush nuk do ta fikë kondicionerin.”

Ndryshe, Danubi, i cili rrjedh nëpër dhjetë vende nga Gjermania jugperëndimore deri në Detin e Zi, është tërhequr në nivele të ulëta të papara përgjatë pjesës më të madhe të rrjedhës së tij. Kjo ka ekspozuar shkëmbinj, rërë dhe anije të vjetra të mbytura që rrallë ishin të dukshme më parë.

Niveli i ujit në lumin Danub pritet të bjerë edhe më tej në ditët në vijim pasi nuk parashikohen reshje të konsiderueshme, ndërsa temperaturat në të gjithë rajonin pritet të rriten në më shumë se 38 °C.