Xhelal Sveçla shpallet fajtor për hedhjen e gazit lotsjellës në Parlament
Gjykata Themelore në Prishtinë e ka shpallur fajtor ministrin në detyrë të Punëve të Brendshme, Xhelal Sveçla, për hedhjen e gazit lotsjellës në Parlament në 21 Mars të vitit 2018.
Xhelal Sveçla u shpall fajtor për veprën penale “Përdorimi i armës apo mjetit të rrezikshëm”, ndërsa për veprën “Pengimi i personit zyrtar në kryerjen e detyrës zyrtare” gjykata ka marrë aktgjykim refuzues, për shkak të parashkrimit të ndjekjes penale.
Shkalla e dënimit do të bëhet e ditur më 8 shtator, kur është caktuar seanca për paraqitjen e rrethanave lehtësuese dhe rënduese. Sveçla nuk ishte i pranishëm në seancë.
Gjatë procesit, Prokuroria ka paraqitur prova, përfshirë një incizim ku, sipas saj, Xhelal Sveçla shihet duke aktivizuar dhe hedhur gazin lotsjellës në sallën e Parlamentit. Deputetët e Lëvizjes Vetëvendosje dhe opozitës së atëhershme kishin përdorur gazin lotsjellës për të kundërshtuar marrëveshjen për demarkacionin me Malin e Zi.
Avokati i Sveçlës, Laur Prenaj, e ka cilësuar vendimin si “të pazakontë” dhe ka paralajmëruar ankesë pasi të pranohet vendimi i plotë.
Sipas Kodit Penal, për përdorimin e armës apo mjetit të rrezikshëm parashikohet dënim me burgim prej një deri në tetë vjet, ndërsa në rrethana kërcënuese ose frikësuese, dënimi mund të jetë deri në dhjetë vjet.
Ndryshe, javën e kaluar, ish-ministri në detyrë i Punëve të Jashtme, Glauk Konjufca, u shpall i pafajshëm në një rast të ngjashëm për hedhje të gazit lotsjellës në Parlament.
