Zëdhënësi i Kremlinit me COVID-19

Zëdhënësi i Kremlinit, Dmitry Peskov, tha se ka dalë pozitiv në testin për COVID-19 dhe tani është në spital duke u trajtuar.

“Po, jam sëmurë. Jam duke u trajtuar,” tha sot zëdhënësi i Presidentit të Rusisë, Vladimir Putin.

Peskov është zyrtari i lartë rus që infektohet me koronavirus, pas Kryeministrit të Rusisë, Mikhail Mishustin, ministren e Kulturës, Olga Lyubimova dhe ministrin e Infrastrukturës, Vladimir Yakushev.

Ky njoftim vjen një ditë pasi Vladimir Putin tha se Rusia është treguar e suksesshme në uljen e shkallës së infektimit me koronavirus, raporton RFE, prandaj ka bërë të ditur disa lehtësime të kufizimeve, të cilat janë marrë me qëllim të luftimit të kësaj sëmundjeje.

Sipas të dhënave të Universitetit Johns Hopkis, Rusia sot është kthyer në shtetin e dytë të prekur më së keqi në botë me COVID-19, pasi ka regjistruar mbi 230.000 persona të sëmurë.