Zgjedhja Presidentit, Abdixhiku: U dakorduam të mos takohemi më! Kurti: Kosova po shkon drejt zgjedhjeve!

Takimi i sotëm në mes të liderit të Lëvizjes Vetëvendosje, Albin Kurti, dhe Kryetarit të LDK, Lumir Abdixhiku, përfundoi pa një zgjidhje lidhur me çështjen e Presidentit të Republikës, por, jo edhe pa një Vendim.

Derisa Abdixhiku tha se u dakorduan që të mos takohen pasi Albin Kurti insistonte që posti i presidentit t’i mbetet Vetëvendosjes, vetë Kurti tha se LDK-së i ofroi bashkëqeverisje dhe Kryetarin e Parlamentit, por e refuzuan.

Fillimisht LDK-së iu ofrua posti i Zv/Kryeministrit e katër ministri, tha kreu i LVV, Albin Kurti, e më pas një tjetër ofertë ishte edhe për kreun e Parlamentit.

“Kur u refuzua oferta jonë për bashkëqeverisje që LDK të ketë zëvendëskryeministrin dhe katër ministri nën shpjegimin që LVV nuk duhet t’i ketë të tri pozitat e larta shtetërore, atëherë ne bëmë një ofertë tjetër për LDK-në, e kjo është që pozita e kryetarit të Kuvendit dhe e nënkryetarit të Kuvendit të pësojnë një rokadë, ashtu që ose nënkryetari i LDK-së ose dikush tjetër për të cilin përcaktohet LDK-ja të zë pozitën e kryetarit të Kuvendit, ndërkaq kryetarja aktuale e Kuvendit dhe ushtruesja e detyrës së presidentes do të bëhej nënkryetare e Kuvendit, aty ku tash është pozita e LDK-së,” tha Kurti pas takimit të dështuar i bindur se kjo do të ishte mënyra që vendi të mos shkonte në zgjedhje te tjera, sipas tij, të panevojshme.

“Në këtë mënyrë ne do ta kishim edhe më tej qeverinë, nuk do t’i kishim zgjedhjet e panevojshme, por përveç kësaj LDK do ta kryesonte legjislativin, ndërkohë ne për kandidatin tonë, Glauk Konjufcën nuk kemi kërkuar votë për nga LDK. Ata le të votojnë si të duan, abstenim kundër edhe për, por le të votojnë. Konsiderojmë që qasje shtetformuese, shtetndërtuese, progresive është ajo në të cilën deputetët e marrin të drejtën e tyre edhe si detyrim, si llogaridhënie, si përgjegjësi ndaj atyre që i përfaqësojnë dhe për funksionimin sa më të mirë të shtetit.”

 Kryeministri i Kosovës i cili sot kishte kohë më shumë se kurrë sqaroi para gazetarëve se LVV nuk e ka pasur asnjëherë me çdo kusht Galauk Konjufcën si President.

“Nuk është e rastësishme që ne e kemi propozuar Glauk Konjufcën më pak se 30 orë para mesnatës ndërmjet 5 e 6 marsit e kundërkandidaten, deputeten, Fatmire Mulhaxha Kollçaku, e kemi propozuar më pak se tri orë ndërmjet 5 e 6 marsit. Nuk kemi qenë asnjëherë interesuar që të jemi total tek udhëheqja e shtetit në të tri pozitat e larta, mirëpo kur askush nuk sjellë asnjë emër, ne ishim të detyruar që të ecim përpara si fitues të zgjedhjeve. Le të mos harrojmë që për herë të parë në histori të Kosovës një subjekt politik i ka 51, 1 për qind, dhe kjo ka qenë jo veç e paparë, por edhe e pa imagjinueshme, veçse ky është vullneti i popullit. Ne nuk mund të krijojmë bashkëpunime e bashkëqeverisje në kundërshtim me vullnetin e popullit, në kundërshtim me rezultatin e zgjedhjeve,” tha Albin Kurti duke theksuar se nuk është mirë që të keqpërdoret çështja e kuorumit në mënyrë që të mos njihet rezultati i zgjedhjeve duke përfunduar:

“Nëse nuk ndryshon diçka në këto ditët e mbetura, atëherë thjesht mua më mbetet të konstatoj që ka më shumë dëshirë, vullnet, interesim për zgjedhje të reja, sesa kjo prezantohet,” tha kreu i LVV, Albin Kurti duke konkluduar se LDK nuk ka qenë e interesuar për president, sepse ka thënë se nuk kanë numra për këtë gjë ndërsa përfundoi:

“LDK i ka 15 deputetë, me 15 deputetë mundesh me ia mbledhë nënshkrimet vetëm për gjysmë një kandidati se edhe për kandidat të duhen 30.”

Abdixhiku: U dakorduam të mos takohemi më!

Me përfundimin e këtij takimi kreu i LDK, Lumir Abdixhiku, ishte më konkret se kurrë, duke theksuar marrëveshjen e vetme të këtij takimi, nuk do të takohen më për çështjen e Presidentit.

“U dakorduam që të mos takohemi më, dhe nuk kemi pse të takohemi sepse i harxhuam 53 ditë nuk patëm zgjidhje, prapë të takohemi edhe një herë të flasim për president të LVV-së, nuk ka kuptim. Edhe njëherë po them efektivisht LDK e konsideron të mbyllur këtë çështje,” tha kryetari i LDK-së, Lumir Abdixhiku duke theksuar se Kurti insistonte që pozita e presidentit t’i mbetet LVV-së.

“Edhe presidenti t’i takojë 51 për qindëshit është me tepër se sa vullneti qytetar. U përpoqa, provova, nuk arrita fatkeqësisht. Tani i kthehemi LDK-së e do t’i kthehemi misionit të madh të bashkimit të së djathtës,” tha Abdixhiku ndërsa sqaroi se në këtë takim me kreun e LVV-së dhe Kryeministrin Kurti, refuzoi të fliste për çdo gjë tjetër, përveç çështjes së Presidentit.

“Unë refuzova të flasim për çdo  gjë tjetër  pa trajtuar çështjen e presidentit. Problemi ishte presidenti, jo Qeveria. Kosova ka Qeveri edhe Kuvend. Unë u përpoqa, u përpoqëm të gjejmë zgjidhje për presidentin, unë nuk kam hapur diskutime të tjera, nuk kam hapur diskutime as për ekzekutiv as për kryetar Kuvendi, sepse çështja është për president.

Momentin që kishim trajtuar çështjen e presidentit do të mund të trajtonim edhe çështje të tjera. Dhe nuk kemi kërkuar asnjë pozicion për LDK as për mua, kemi pasur qëndrime parimore. Po të ishim pajtuar për propozime parimore, atëherë do të kishim ardhur në fazën e diskutimeve të tjera,” tha Kryetari i LDK-së duke e lënë të hapur diskutimin për partitë tjera ndërsa përfundoi:

“53 ditë nga 60 ditë kemi bërë përpjekje për të gjetur zgjidhje, besoj që kemi pasur kohë mjaftueshëm, 53 ditë janë mjaft, nuk kemi dëgjuar asnjë propozim tjetër përveçse se presidenti të jetë nga radhët e LVV, nuk kemi pasur ndonjë emër tjetër. Janë edhe 7 ditë tjera që partitë tjera mund të bëjnë zgjidhje edhe pa LDK-në, nëse mund ta bëjnë një gjë të tillë çdo gjë është e mirëseardhur. Efektivisht LDK do t’i kthehet strukturave të veta dhe e konsideron këtë çështje të mbyllur”, tha Abdixhiku.