Zgjedhje të parakohshme, PO! Basha në Korçë: Pazar me Edi Ramën, JO!
Kryetari i Patisë Demokratike, Lulzim Basha, duke konstatuar se 30 Qershori provoi që me Edi Ramën nuk ka dhe nuk mund të ketë një proces të lirë e të ndershëm zgjedhor, para strukturave të PD Dega Korçë, theksoi angazhimin e Partisë Demokratike për zgjedhje të lira e të ndershme parlamentare dhe lokale ndërsa i bëri të qartë Kryeministrit se nuk ka pazare.
“Kërkesat tona janë zgjedhjet e parakohshme parlamentare në një ditë me zgjedhje legjitime vendore të mbikqyrura nga një qeveri tranzitore dhe çuarja para drejtësisë e gjithë atyre që kanë vjedhur votat e shqiptarëve,” tha Lulzim Basha duke renditur edhe shkeljet kryesore të konstatuara nga raporti i OSBE-ODIHR, që e bënë procesin të pavlefshëm dhe kriminal: Procesi i votimit pa dekret, mohimi i të drejtës së opozitës për të patur përfaqësuesit në proces, votimi me 1 kandidat dhe regjistrimi i patericave të pushtetit në mënyrë të paligjshme.
Me këtë rast lideri i opozitës u shpreh i sigurt e vendi do të shkojë drejt zgjedhjeve të parakohshme.
“Largimi i Edi Ramës si kryeministër është i padiskutueshëm. Hetimi dhe gjykimi i politikanëve të kapur duke vjedhur votat është i padiskutueshëm. Prandaj ne i qëndrojmë deri në fund zgjidhjes politike përmes parimeve dhe jo Pazarit,” tha Basha duke refuzuar prerë çdo përpjekje për pazar.
“Edi Rama kërkon Pazar. Gjithë jeta e tij politike është Pazar. Kur nuk ka Pazar, shpërfytyrohet, çmendet. Kur nuk ka Pazar, përpiqet me lojën e vjetër “përça e sundo”. Nuk ka Pazar me Edi Ramën. Mercenarët dhe të shiturit tek ai dhe oligarkët e tij nuk e përçajnë dot as PD, as Opozitën.”
Në fund, Kryetari i Partisë Demokratike, Lulzim Basha, tha se fuqia e opozitës është bashkimi më i madh popullor në 3 dekada pluralizëm, është shumica 85% “Rama ik” ndërsa fundi i këtij regjimi do të vijë me zgjedhje të lira:
“Askush që ka grabitur miliona dhe dhunuar e vjedhur shqiptarët e pasuritë e tyre publike, asnjë pushtetar që bashkëpunoi me krimin për të vjedhur zgjedhjet e 2017, nga Dako e Gjiknuri, tek Balla e Rama nuk do të shpëtojë pa dalë para drejtësisë së pavarur. Pushtetarët e korruptuar në pranga janë fillimi i Shqipërisë si gjithë Europa.”
