Zgjedhjet presidenciale/ Maqedoni e Veriut, BESA dhe ASH nuk mbështesin asnjë kandidat!
Dy partitë opozitare shqiptare në Maqedoninë e Veriut, Lëvizja BESA dhe ASH mbeten në qëndrimin e tyre se në raundin e dytë të zgjedhjeve presidenciale nuk do të bëjnë thirrje për të mbështetur asnjë nga kandidatët që janë në garë për presidentë të
Lëvizja BESA dhe Aleanca për Shqiptarët, ASH, theksojnë se nuk do të bëjnë tregti me votat e qytetarëve, të cilët në raundin e parë të zgjedhjeve presidenciale mbështetën konceptin e partive opozitare për kandidatë shqiptar.
Në mbledhjen e Kryesisë qendrore, Lëvizja BESA vetëm se ka vërtetuar këtë qëndrim, ndërsa Aleanca për Shqiptarët ,ASH, pritet që të konfirmoj këtë qëndrim në mbledhjen e së enjtes.
“Në mbledhjen e Kryesisë qendrore u konfirmua qëndrimi paraprak i dhënë në ditën e zgjedhjeve se Lëvizja BESA nuk do të bëjë tregti me votat e dhëna në raundin e parë për mbështetje të konceptit të partive opozitare për kandidatin shqiptar prof. Blerim Reka. Nuk do të thërrasim në mbështetje të cilit do kandidat që kaloi në rrethin e dytë, por do të respektojmë vendimin individual të çdo votuesi për të shfrytëzuar të drejtën e votës. Duke pasur parasysh se në rrethin e parë kandidatura e kandidatit Reka u mbështet nga dy parti opozitare, ditët në vijim mbas konsultimeve të ndërsjella mes partive dhe kandidatit, do të ketë prononcim publik për opinionin për ta komunikuar vendimin së bashku,” tha Nënkryetari i Lëvizjes BESA, Kastriot Rexhepi.
Ndërkaq, nga Aleanca për Shqiptarët e Ziadin Selës theksojnë se asgjë konkrete nuk mund të thonë para mbajtjes së mbledhjes së Kryesisë qendrore, pasi që anëtarët e Kryesisë duhet të sjellin vendimin. Por, megjithatë mësohet se shumica e anëtarëve të Kryesisë mbështesin qëndrimin e liderit të tyre, i cili disa herë ka përsëritur se nuk bën tregti me votat e shqiptarëve, dhe se ato janë pronarë të së drejtës së tyre dhe mund të votojnë sipas bindjes që kanë ato.
Ndryshe, në raundin e parë të zgjedhjeve presidenciale, Lëvizja BESA dhe Aleanca për Shqiptarët mbështetën kandidatin e pavarur Blerim Reka, i cili arriti të marrë 79.921 vota apo 10.58 për qind të votave të vlefshme në zgjedhjet e 21 Prillit. Pas këtyre votave, dhe jo vetëm, kanë dalë në “gjah” dy kandidatët për president, Stevo Pendarovski dhe Gordana Siljanovska Davkova./Koha/
