Zmajeviçit i konfirmohen 14 vjet burg për krime lufte në Kosovë

Gjykata e Apelit në Mal të Zi vërtetoi vendimin me të cilin shtetasi malazez, Vllado Zmajeviç është dënuar me 14 vjet burgim për veprën penale: krime lufte kundër civilëve.

Ish-vullnetari dhe pjesëtari i ushtrisë jugosllave, Vllado Zmajeviç, është dënuar për vrasjen e katër civilëve shqiptarë në fshatin Zhegër afër Gjilanit në vitin 1999. Gjykata e Lartë dhe Gjykata e Apelit në Podgoricë i kanë pranuar provat në bazë të të cilave Vllado Zmajeviç fillimisht ka vrarë një bari sepse ai i është përgjigjur në gjuhën shqipe, raporton RFE. I njëjti më pas ka vrarë edhe dy burra dhe një grua para shtëpisë së tyre.

Gjykatësi i rastit tha se në hetimin e parë Zmajeviç ka pranuar se i ka kryer këto vrasje, por gjatë procedurave gjyqësore i ka mohuar rrëfimet paraprake.

Përfaqësuesi ligjor i familjeve të viktimave, Loro Markiç tha për RFE se familjet e viktimave besojnë se drejtësia është arritur pjesërisht.

“Familjet e dëmtuara konsiderojnë se ky është një ndëshkim i butë për veprat e kryera, sepse bëhet fjalë për viktima që kanë ushqyer familjet e tyre me bukë”, tha avokati Markiq.

Ndryshe, në luftën e fundit në Kosovë, më 1998/1999 janë vrarë rreth 13.500 persona. Të pagjetur mbeten më shumë se 1.600 persona.