Zyrtare/ Partia e Erdoganit kërkon rivotim në Stamboll

Partia e presidentit të Turqisë, Rexhep Taip Erdogan, AK, e ka dorëzuar kërkesën për anulimin dhe përsëritjen e zgjedhjeve në Stamboll, raporton “CNN Turk”, më shumë se dy javë pas votimit.

Sipas rezultateve jozyrtare të zgjedhjeve në Stamboll, Partia opozitare Republikane Popullore, CHP, e ka fituar me një rezultat të ngushtë qytetin më të madh të Turqisë, duke i dhënë fund 25 viteve të kontrollit të partisë AK mbi një qendër të rëndësishme. Zv.kryetari i AKP-së, Ali Ihsan Yavuz e ka dorëzuar apelin e jashtëzakonshëm të partisë së tij për anulim dhe rivotim në Stamboll, pranë Bordit të Lartë Zgjedhor të Turqisë, YSK, raporton Reuters.

Po qe se apeli miratohet, rivotimi do të mbahet të dielën e parë pas 60 ditësh të votimit, që i bie 2 Qershor. Po qe se hedhet poshtë, rezultatet do të zyrtarizohet dhe fituesit do t’i jepet mandati.