Policia britanike arreston personin që pretendonte se kishte bombë

Policia britanike ka njoftuar të premten se ka arrestuar një person në stacionin hekurudhor, Charing Cross në Londër, pasi kishte pretenduar se ka pasur bombë.

“Ne tani jemi duke punuar për të hapur stacionin sa më shpejt që është e mundur”, thuhet në një njoftim të policisë.

Pamjet në rrjetet sociale kanë treguar prezencë të madhe të policisë, duke përfshirë zyrtarë të armatosur.

Ky stacion shërben për të lidhur Londrën me pjesën juglindore të Anglisë.

Britania aktualisht gjendet në shkallën e dytë të rrezikut, që i bie se ka mundësi të mëdha që një sulm i militantëve të ndodhë në këtë shtet.