Mirëmbajtja e rrugëve në pikëpyetje, BB: Të krijohet mekanizëm i qëndrueshëm financimi!
Banka Botërore vlerëson se shpenzimet e Shqipërisë në mirëmbajtjen e rrugëve kanë shënuar rritje të dukshme vitet e fundit, ku ndikim domethënës ka pasur edhe projekti që po financohet prej saj, por para shtrohet dilema nëse do të ketë qëndrueshmëri edhe pas tij.
Sipas Bankës, vendi duhet të krijojë një mekanizëm të qëndrueshëm financimi për programin e mirëmbajtjes dhe ta shtrijë atë në gjithë asetin rrugor. Ndërkohë duhet të krijohet gradualisht një kulturë mirëmbajtjeje dhe performance.
“Edhe pse projekti në vazhdim i Mirëmbajtjes në Bazë të Performancës dhe Sigurisë në Rrugë i financuar nga Banka Botërore ndihmoi në rritjen e shpenzimeve për mirëmbajtjen e rrugëve gjatë zbatimit të projektit, qëndrueshmëria e financimit të mirëmbajtjes së rrugëve përtej mbylljes së tij, mbetet e diskutueshme. Në vitin 2019, nga gjithsej 24 miliardë lekë buxhet për rrugët kombëtare, vendi shpenzoi rreth 11.2 miliardë lekë në mirëmbajtje dhe punime rehabilitimi , krahasuar me një shpenzim për mirëmbajtje mesatare vjetore prej 3.4 miliardë lekësh (rritje 230%) në tre vitet e mëparshme.
Vendi sidoqoftë duhet të krijojë një mekanizëm të qëndrueshëm financimi për mirëmbajtje përtej datës së mbylljes së projektit dhe ta zgjerojë atë në gjithë asetin rrugor, si dhe të mbajë kulturën e performancës” thuhet në dokumentin e Bankës Botërore.
Gjatësia e përgjithshme e rrjetit rrugor të Shqipërisë është rreth 18,300 km, përfshirë 3,945 km të rrjetit rrugor kombëtar (NRN) dhe 14,355 km të rrugët rajonale, lokale dhe private të hyrjes. Autoriteti Rrugor Shqiptar (ARRSH) nën Ministrinë e Infrastrukturës dhe Energjisë, është përgjegjës për menaxhimin rrjeti rrugor kombëtar, ndërsa bashkitë janë përgjegjëse për rrugët rajonale dhe lokale.
Herë pas here ka pasur projekte të rehabilitimit të rrugëve, ku një prej tyre ka qenë ai i rrugëve sekondare aplikuar nga Fondi Shqiptar i Zhvillimit, ndërkohë që prej disa vitesh po zbatohet projekti i mirëmbajtës në bazë të performancës mbështetur nga Banka Botërore me bashkëfinancim nga qeveria shqiptare. Përmes katër kontratave po bëhet mirëmbajtja e 1335 kilometrave rrugë në bazë të performancës përmes kontratave 5-vjeçare./Monitor/
