Volumet e transportit të mallrave kalojnë nivelin e para krizës, pasagjerët nuk rikuperohen

Sektori i transportit, një nga më të goditurit e krizës pandemike u ringjall këtë vit, por në muajin prill përpunimi dhe transporti i mallrave në porte e kaloi nivelin e para krizës, teksa transporti i pasagjerëve shfaqi dobësi në raport me periudhën e para krizës, për shkak se ende janë në fuqi masat kufizuese në lëvizje.

Sipas INSTAT, volumi i mallrave të ngarkuara/shkarkuara në porte, në muajin Prill 2021 është 451,6 mijë ton, duke u rritur 27,7% krahasuar me prill 2020. Krahasuar me mesataren e muajve Prill për periudhën 2018-2020, volumi i mallrave të ngarkuara/shkarkuara në porte është rritur 24,6%.

Në katërmujorin e parë vitit 2021, volumi i mallrave të përpunuara në porte është 1.531,9 mijë ton, duke u rritur me 18,1%, krahasuar me katërmujorin e parë të vitit 2020.

Në muajin prill 2021, volumi i mallrave të transportuara me hekurudhë është 2.333 mijë ton-kilometër, duke u rritur 3,1 herë, krahasuar me Prill 2020. Krahasuar me mesataren e muajve prill për periudhën 2018- 2020, volumi i mallrave të transportuara me hekurudhë është rritur me 30,5%. Në katërmujorin e parë vitit 2021, volumi i mallrave të transportuar me hekurudhë është 10.436 mijë ton/kilometër, duke u rritur me 11,1%, krahasuar me katërmujorin e parë të vitit 2020.

Në prill volumi i mallrave të transportuar me ajër është 161 ton, duke u rritur 2 herë, në krahasim me Prill 2020. Krahasuar me mesataren e muajve Prill për periudhën 2018-2020, volumi i mallrave të transportuara me ajër është rritur me 4,9%.

Në katërmujorin e parë të vitit 2021, volumi i mallrave të transportuar me ajër është 610 ton duke u rritur me 3,2%, krahasuar me katërmujorin e parë të vitit 2020. Në Prill 2021, numri i fluturimeve të kryera është 1.204 duke u rritur 7,9 herë, në krahasim me Prill 2020. Krahasuar me mesataren e muajve Prill për periudhën 2018-2020, numri i fluturimeve është ulur me 16,4%.

Në Prill 2021, numri i pasagjerëve që udhëtojnë me linjë detare është 30.413 pasagjerë. Krahasuar me Prill 2020, ky tregues është rritur 9,6 herë. Krahasuar me mesataren e muajve Prill për periudhën 2018-2020, numri i pasagjerëve që udhëtojnë me linjë detare është ulur me 33,4%.

Në katërmujorin e parë të vitit 2021, kanë udhëtuar me linjë detare 118.715 pasagjerë, duke u ulur me 8,0%, krahasuar me të njëjtën periudhë të vitit 2020. Në muajin Prill 2021, transporti ajror i pasagjerëve zë 76,7% të transportit gjithsej.

Numri i pasagjerëve që kanë udhëtuar me linja ajrore, në Prill 2021 është 101.354 pasagjerë duke u rritur 25,4 herë krahasuar me Prill 2020. Krahasuar me mesataren e muajve Prill për periudhën 2018-2020, numri i pasagjerëve që kanë udhëtuar me linja ajrore është ulur me 33,2 %.

Në katërmujorin e parë të vitit 2021, numri i pasagjerëve që kanë udhëtuar me linja ajrore është 342.804 pasagjerë duke u ulur me 34,0 %, krahasuar me katërmujorin e parë të vitit 2020./Monitor/