Turizmi në mandatin e tretë, aty ku nuk ka vrasje, dekompozohen plehrat!

Qytetarët dhe turistët në Durrës menduan se janë të privilegjuar që nuk ka vrasje në këtë qytet bregdetar meqë deputet është vetë Kryeministri Edi Rama, por ata sot konstatojnë se janë në rrezik nga një infektim masiv nga plehrat që për pesë ditë nuk i pastron njeri dhe kanë filluar të dekompozohen.

Ky alarm vjen sot kur u mendua se shteti do të lëviz pasi disa qytetarë në disa lagje ua vunë flakën mbeturinave, duke deklaruar se era e rëndë dhe infeksionet rrezikojnë të përhapen prej dekompozimit të mbeturinave në temperaturat mbi 40 gradë Celsius, sot sërish ra heshtja.

Ndërkohë kamionët e Ndërmarrjeve të Shërbimit Komunal të Durrësit dhe Shijakut, thonë se nuk kanë ku të shkarkojnë plehrat ndërsa përsëritin skenarin për të detyruar qeverinë të paguajnë koston e depozitimit të mijëra ton mbetjeve të bashkisë Durrës.

Nëse është ky turizmi në mandatin e tretë të Edi Ramës dhe jemi vetëm në ditët e para të tij, dhe aty ku nuk vritesh, rrezikohesh nga plehrat e dekompozuara mbi trotuare sepse kazanët janë përplotë ndërkohë temperaturat janë tropikale, nuk rrezikohet vetëm turizmi në Durrës, Velipojë e Vlorë, por dhe ekonomia kombëtare e cila filloi të frymojë pas dy viteve të vështira me tërmet dhe pandemi.

E qytetarët e Durrësit, edhe këtë krim shtetëror që po përjetojnë në ditët kur bregdeti duhet të gëloj nga turistët dhe gëlon nga plehrat, ata nga shteti kërkojnë minimalen: Na hiqni plehrat, po mbytemi!