Fajtori pa përgjigje, Basha: Policët e ndershëm u tradhtuan nga regjimi!

Pas incidentit të 3 efektivëve të policisë me Kryetarin e Bashkisë Lezhë, Pjerin Ndreu, dhe deklaratave të Kryeministrit Edi Rama për Policinë e Shtetit, ka reaguar Kryetari i Partisë Demokratike Lulzim Basha, duke theksuar se punonjësit e ndershëm të policisë janë të tradhtuar nga regjimi Rama-Doshi. Zgjidhja është një dhe e vetme: Prerja e lidhjeve të pushtetit me krimin!

“Punonjësit e ndershëm të policisë janë të tradhtuar nga regjimi Rama-Doshi. Kur vjen në pushtet me krimin, policia përdoret si vegël për të mbrojtur lidhjet e pushtetit me krimin. Pasojat e këtij modeli që sundon vendin i vuajnë qytetarët, fëmijët dhe familjet shqiptare,” thekson Lulzim Basha në reagimin e tij përmes rrjetit social Twitter duke përfunduar:

“Zgjidhja është prerja e lidhjeve të pushtetit me krimin. Prandaj fajtori ishte sot pa përgjigje. Peshku qelbet nga koka!”

Ndryshe, Kryetari i Bashkisë së Lezhës, Pjerin Ndreu, është kallëzuar penalisht në Prokurori, nga tre efektivë të Policisë së Shtetit, me pretendimin se i ka penguar të ushtrojnë detyrën. Ngjarja ka ndodhur në zonën turistike të Shëngjinit, jashtë ambienteve të një hoteli në vijën e parë të bregdetit kur punonjësit e Policisë kanë kërkuar ndërprerjen e muzikës dhe mbylljen e lokalit, por kanë hasur në kundërshtinë e pronarit të subjektit. Përballë rezistencës, në ndihmë të patrullës së Shëngjinit ka shkuar forca e posaçme “Shqiponja”, të cilët në debat e sipër kanë tentuar të shoqërojnë në Komisariat pronarin e hotelit, por referuar kallëzimit penal, në ato momente ka dalë nga lokali kryebashkiaku i Lezhës, Pjerin Ndreu, duke i penguar që të ushtrojnë detyrën, me pretendimin se ligjin e bënte ai:

“Ligjet i bëj unë dhe i vendos unë…”, për të mos krijuar një situatë më të rëndë, ne jemi tërhequr duke njoftuar me radio sallën operative dhe eprorët tanë. Ata nuk ndërmorën asnjë veprim dhe na thanë në telefon:

“Lëreni mos u merrni më, largohuni prej aty.”

Pas kësaj skene të krimit, Kryeministri Edi Rama u mjaftua me komentin se të gjithë mund të gabojnë ndërsa Pjerin Ndreu sërish ka reaguar duke akuzuar efektivët e policisë që zbatuan ligjin:

“Kallzim penal nga policë barkderra, që kapërcejnë kompetencat…”