Maqedoni e Veriut, edhe 1.074 raste dhe 24 viktima nga COVID-19

Maqedonia e Veriut sot ka regjistruar 24 të vdekur me COVID-19, që shënon shifër rekord sa i përket viktimave që nga paraqitja e valës së re të infektimeve me koronavirus në dy muajt e fundit.

Sipas raportit të Ministrisë së Shëndetësisë, raporton RFE, viktimat janë: Shkup (6), Kumanovë (5), Tetovë (4), Kërçovë (3), Gostivar (2) dhe nga një në qytetet e Manastirit, Ohrit, Strumicës dhe Valandovës.

Sa i përket të infektuarve, nga 4.982 teste të kryera janë regjistruar 1.074 të infektuar me koronavirusin e ri, apo 14.2 për qind nga numri i të testuarve.

Më shumë raste janë shënuar në Shkup, Tetovë, Gostivar, Kumanovë dhe Strumicë.

Në Maqedoninë e Veriut deri më tani rreth 166 mijë të diagnostikuar me COVID-19, prej të cilëve, 5.632 persona kanë vdekur, ndërsa raste aktive janë 9.417.

Ministria e Shëndetësisë, në një raport të publikuar për dy javët e fundit, ka bërë të ditur se në këtë periudhë janë infektuar me COVID-19 9.881 qytetarë, nga të cilët, 1.507 të vaksinuar me nga dy doza, apo 15 për qind nga gjithë të infektuarit.

Kjo, sipas Ministrisë së Shëndetësisë, thekson nevojën e vaksinimit të popullatës, si mundësi e vetme për mbrojtje nga infektimi.

Interesimi për vaksinim ka shënuar rritje në të gjitha qytetet, madje në Tetovë dhe Gostivar, dy qytetet më numrin më të lartë të infektuarve janë shënuar edhe incidente në radhë e gjatë të pritjes për marrjen e vaksinës.

Deri më sot, sipas të dhënave zyrtare, janë administruar mbi 1 milion e 100 mijë vaksina, kurse nga dy doza kanë marrë rreth 500 mijë qytetarë.

Me qëllim të mbrojtjes nga përhapja e virusit, në Maqedoninë e Veriut në fuqi janë masat që ndalojnë të gjitha aktivitetet në objektet e gastronomisë, qendrat tregtare dhe institucione tjera shëndetësore e kompani private, pa certifikatë për marrjen e vaksinës.