Gjermanisë i duhen 400 mijë emigrantë të kualifikuar në vit

Gjermanisë i duhen 400 mijë emigrantë të kualifikuar në vit, tha sot Drejtori i Zyrës Federale për Punësim, Detlef Scheele, dhe për arsye demografike kërkesa për punëtorë të kaulifikuar nga viti në vit është gjithnjë e më e madhe.

“Këtu nuk e kam fjalën për ata që aplikojnë për azil por ata që emigrojnë me qëllim të mbushjes së boshllëkut në tregun gjerman të punës. Nga punëtorit e kujdesit shëndetësor deri tek teknikët e kondicionerëve dhe ata me arsim akademik: Gjermanisë në çdo sektor i duhen punëtorë,” tha Scheele për Sueddeutsche Zeitung duke saktësuar që në këtë vit numri i të rinjve që i duhen tregut të punës është për 150 mijë më i vogël, dhe ky numër do të rritet nga viti në vit.

“Gjermania mund ta zgjidhë problemin duke kualifikuar ata të pakualifikuarit që janë në Gjermani, duke shndërruar vendet e punës me orar të kufizuar në vende pune me orar të plotë dhe emigrimin me qëllim të plotësimit të tregut të punës,” tha Detlef Scheele.

Zgjidhja e këtij problemi, sipas Drejtorit të Zyrës Federale për punësim, Detlef Scheele, do të jetë njëra ndër detyrat më të mëdha të qeverisë së ardhshme gjermane e cila do të marrë udhëheqjen e vendit pas zgjedhjeve parlamentare që zhvillohen në muajin shtator. Njëkohësisht, politika duhet t’u sqaroj kundërshtarëve të emigracionit se si pa importin e fuqisë punëtore ekenomia gjermane nuk do të ketë mundësi të funksionoj, përfundon Scheele.