Zgjatja e mandatit të organeve të vettingut, sot nis shqyrtimi në Komisionin e Ligjeve

Kërkesa e Partisë Socialiste për ndryshim të Kushtetutës me qëllim zgjatjen e mandatit të organeve të vettingut të magjistratëve, do nisë të shqyrtohet sot në mbledhjen e përbashkët të Këshillit për Legjislacionin dhe Komisionit parlamentar të Ligjeve.

Në amendamentet kushtetutese, të cilat u depozituan zyrtarisht më 15 tetor në Kuvend me firmat e mbi 28 deputetëve socialistë, parashikohet që mandati i Komisionit të Pavarur të Kualifikimit dhe Komisionerëve Publikë, i cili përfundon në qershor të vitit 2022, të shtyhet deri në fund të vitit 2024.

Në nisjen e mbledhjes, së pari do bëhet prezantimi i nismës, duke ofruar arsyet dhe përse është i nevojshëm ky amendim. Ligji aktual parashikon që në momentin kur mandati i organeve të vettingut përfundon, atëherë verifikimin e gjyqatërëve dhe prokurorëve e bën KLGj dhe KLP. Por publikisht mazhoranca ka bërë të qartë nevojën për të pasur një trajtim të njëjtë për të gjithë magjistratët përmes organeve të vettingut.

Më pas në mbledhjen e përbashkët të Këshillit për Legjislacionin dhe Komisionit të Ligjeve, do miratohet procedura që do të ndiqet dhe kalendarit për shqyrtimin e nismës, si dhe do caktohen relatorët dhe ekpertët konstitucionalistë.

Ndryshe, edhe Partia Demokratike ka depozituarkërkest e saj për rishikim të Kushtetutes për reformën zgjedhore, atë territoriale dhe sanksionimin në Kushtetutë te vettingut në politikë.

Ndërkohë për shtyrjen e mandatit të organeve të vettingut, Kryeministri Edi Rama është shprehur se nuk negocion me Partinë Demokratike pasi ajo është e detyruar ta votoj meqë ka nbështetjen e SHBA dhe BE.