Të gjithë të punësuarit në New York duhet të vaksinohen, zjarrfikësit dhe policia po rezistojnë
Sot është dita e parë e punës në New York kur me urdhër të Kryetarit të Bashkisë, Bill de Blasio, të gjithë të punësuarit duhet të jenë të vaksinuar kundër COVID-19, edhe pse shumë policë dhe zjarrfikës vazhdojnë ta refuzojnë vaksinimin, e njëri prej udhëheqësve të sindikatës, vaksinimin e detyrueshëm e quajti recetë për katastrofë.
De Blasio, demokrati i cili para më pak se dy javësh paralajmëroi vaksnimin e detyrueshëm, e bindi qytetin prej 8.8 milionë banorëve se të punësuarit mund të përballojnë çdo mungesë të policëve, zjarrfikësve ose punonjësve sanitarë përmes ndryshimeve të orarit dhe punës jashtë orarit.
“Edhe një rritje e madhe për raport. Përqindja e vaksinimit @FDNY EMS shkon deri 87 për qind,” tha mbrëmjen e së dielës përmes rrjetit social Twitter, Danielle Filson, zëvendësja e përfaqësuesit për publikun të De Blasios.
Udhëheqësit sindikal: Nëse shpërbëhet sistemi, De Blasio fajtor!
Niveli i policëve dhe zjarrfikësve të vaksinuar është më i ulët se i të punësuarëve të tjerë, e udhëheqësit e sindikatave theksojnë se De Blasio do të jetë fajtor nëse shpërbëhet sistemi në shërbimet emergjente të qytetit më të madh amerikan.
“Na duhen të gjithë në mënyrë që të mbajmë funksionimin e qytetit dhe që ta mbrojmë atë. Do të bëjmë përpjekje të parandalojmë atë që do të jetë katastrofë e pashmangshme sipas planit të mëngjesit të së hënës,” tha Kryetari i Shoqatës së Zjarrfikësve me uniformë, Andrew Ansbro.
Udhëheqësit e sindikatave theksojnë se anëtarëve të tyre u është dhënë vetëm nëntë ditë afat që të vaksinohen, afat të cilin e ka dhënë Kryetari i Bashkisë New York, e ata që kanë kaluar infektimin me COVID-19 duhet të përjashtohen. Kjo përfshinë rreth 70 për qind të zjarrfikësve, tha Ansbro.
Ky është dhe kontestimi më i ri në SHBA rreth vaksinimit të detyrueshëm i cili imponohet gjithnjë e më shumë nga liderët politik duke përfshirë këtu dhe presidentin Joe Biden, në mënyrë që të parandalojnë përhapjen e variantit Delta të koronavirusit.
Policët dhe zjarrfikësit në Chicago dhe Los Angeles gjithashtu e kundërshtojnë fuqishëm këtë detyrim!.
Të pavaksinuarit pa rroga
Punonjësit shëndetësor të New Yorkut thonë se ndonëse studimet duhet të përcaktojnë nivelin dhe jetëgjatësinë e imunitetit nga COVID-19 pas infektimit dhe sëmundjes, ekspertët janë dakord se vaksina mund të ofroj mbrojtje shtesë.
De Blasio parashikonte rritjen e përqindjes së vaksinimit duke shtuar se këto afate kanë nxitur edhe punonjësit tjerë shtetëror dhe të qytetit të New Yorkut që të vaksinohen në momentin e fundit ndryshe do të mbesin pa rroga.
Përpjekjet ligjore të policisë dhe zjarrfikësve të New Yorkut deri më tani ishin të pasuksesshme, e gjykatat shtetërore dhe federale nuk kishin vullnet të anulojnë vaksinimin e detyrueshëm.
