Flamuri i shtetit të Edi Ramës!

nga Agim Popoci

Sa më shumë që Kryeministri Edi Rama e hap Ballkanin me Presidentin e Serbisë, Aleksandar Vuçiç, aq më shumë e shohim flamurin shqiptar se si i vihet flaka në Beograd. Ose më saktë, flamurin e shtetit të Edi Ramës! Pse?!

Nga momenti që Edi Rama mori pushtetin dhe deri më sot, nga Shqipëria u larguan mbi 700 mijë shqiptarë thonë statistikat e emigracionit drejtë vendeve të BE! Në të gjitha ato shtete ku nuk lejohet dyshtetësia, shqiptarët pa problem e grisën pasaportën e tyre ose më saktë pasaportën e shtetit të Edi Ramës!

Kush e përdhosi dinjitetin e kësaj pasaporte?! Përgjigjen e gjejmë në historinë e shtetit shqiptar, përgjatë së cilës, shqiptarët kur nuk e kishin Edi Ramën kryeministër nuk është se ishin shumë të pasur por mburreshin me të, dhe shteti kujdesej për bartësin e kësaj pasaporte.

I tillë është rasti edhe me flamurin!

Nga Edi Rama kemi dëgjuar rrëfenja të gjyshes me pagëzimin e tij në ortodoks  e katolik, në bazë të nevojës, e meqë mungon ajo e gjyshit si pjesë e oborrit mbretëror për shtetin, pasaportën e flamurin shqiptar, sot shqiptarët duhet ta kuptojnë pse Kryeministri i tyre nuk reagon kur flamurit të shtetit të tij i vihet flaka dhe përdhoset, çuditërisht gjithmonë nga serbët, ata me të cilët Rama mendon ta hap Ballkanin!

Kemi parë Edi Ramën të pashqetësuar edhe kur është folur për flamurin në ndonjë ceremoni me kokën e shqiponjës teposhtë, ishte kinez ose jo pak rëndësi ka, por për ti dhënë “cezarit shqiptar” ajo që i takon “cezarit shqiptar” duhet pranuar që për flamurin ashtu si për shtetin shqiptar nuk është se kanë menduar të gjithë krerët shtetëror. Këtu vijmë edhe te rrëfenja e munguar e gjyshit të Edi Ramës, që atë e bënë indiferent si ndaj flamurit ashtu dhe shtetit shqiptar!

Kur Edi Rama e mori në administrim shtetin shqiptar ai kishte një pasaportë dhe flamur që nuk kishte arsye asnjë shqiptar që të turpërohej. Jo se flamuri që gjeti në zyrat e shtetit ishte ashtu siç do ti rrëfente gjyshi, as ai që kishte qëndisur Marigo Sposa, por flamuri shqiptar kishte një formë të përcaktuar shumë kohë më parë.

Ishte 2 qershori i vitit 1922 kur Mehmed Konica konstaton se ka ardhur momenti që njëherë e përgjithmonë t’i jepet forma flamurit kombëtar dhe vulës zyrtare, sepse në zyrat e ndryshme shqiptare nëpër botë, edhe pse sfondi ishte i kuq, pendët e shqiponjës diku ishin tatëpjetë si në vulën e Ministrisë së Punëve të Jashtme, e diku përpjetë, si në vulën e Ministrisë së Punëve të Brendshme.

“Kur arritëm në Romë herën e fundit me Imzot Nolin, atëherë Ministër i Punëve të Jashtme, dërguam z.Kote në Napoli që të marr fotografinë e shqiponjës që gjendet mbi varrin e të birit të Skenderbeut për t’u marr si model për flamurin kombëtar, por mjerisht Z.Kote, me lajthim mori fotografinë  e Shqiponjës që ishte mbi varrin e një Peshkopit Kastrioti, dhe kështu mbeti prapë punë e varur. Për t’i dhënë fund kësaj çështje me rëndësi, ngarkova dy nga zoografët më të mirë të Londrës për zoografinë e Shqiponjës. Cilido prej tyre më dërgoi dy Shqiponja, njëra me pendët  tatëpjetë dhe tjetra me pendët përpjetë. Kam nderin t’jua mbyll këto katër modelet brenda dhe ju lutem të pëlqeni njërën nga këto,” i shkruan Mehmed Konica, Ekselencës së tijë, Kryeministrit dhe Ministrit të Punëve ët Jashtme, Xhafer Bej Ypit.

U deshtën plotë katër vjet punë intensive në projektimin dhe modelimin e të gjitha simboleve shtetërore, miratimin nëpër komisione parlamentare dhe Këshill Kombëtar, për t’u firmosur më 12 korrik të vitit 1926 nga Kryetari i Republikës i mveshun prej vullnetit të popullit me fuqinë sovrane të shtetit, Dekretligji mbi stemën e shtetit dhe Flamurin zyrtar. Kështu duke filluar nga kjo ditë, shteti shqiptar kishte Flamurin zyrtar të Shtetit, Flamurin për repartet luftuese të Armatës së Shtetit, Flamurin Kombëtar dhe Flamurin e Marinës Tregtare. Flamuri kombëtar ndryshon nga ai zyrtar i shtetit, sipas këtij dekreti, vetëm që nuk ka dimension fiks dhe varet nga ai që përdor flamurin. Ndërsa Flamuri për repartet luftuese të Armatës së Shtetit ishte Flamuri që përdor edhe Lartmadhëria e tij.

Ky dekretligj për Stemën dhe Flamurit përfundimisht u miratua nga Parlamenti dhe u dekretua nga Lartmadhnia e tij Mbreti Zog si Ligj, më 8 Gusht të vitit  1929.

Shumë pushtete u ndërruan në tokën shqiptare, dhe ato Flamurit kombëtar vetëm se i shtuan tiparet e ideologjive të tyre shtetërore e Shqipëria dhe shqiptarët ngelën tokë e shqipeve me ngjyrat kuq e zi deri sa erdhi në pushtet Edi Rama!

Pse duhet hapur Ballkani dhe Shqipëria të bëhet një me Serbinë, Edi Rama harxhoi shumë energji për ti bindur shqiptarët, ashtu si dhe shumë policë e patronazhistë për ta ruajtur flamurin serb në tokën shqiptare! Por, kur dikush  i fliste për kokën teposhtë të shqiponjës dykrenare në flamurin shqiptar, Kryeministri Rama gajasej sepse po ndërtonte një shtet pa identitet ashtu siç bëri me kryeqytetin pas 12 vjetësh!

Sot nuk mund ti kërkoj njeri Edi Ramës të rrëqethet kur e sheh, prek ose puth flamurin shqiptar, por çdo qytetar i Republikës së Shqipërisë duhet ti kërkoj Kryeministrit Rama që të respektoj simbolet shtetërore brenda dhe jashtë vendit, jo me Dekretin e 8 Gushtit të vitit 1929, por, të paktën siç e respektojnë patronazhistët Ramën dhe shtetin e tij, në ditën e rrogave.

Sot Edi Rama nuk ka pse aktron në Beograd për ti thënë Vuçiçit se Kosova është shtet i pavarur dhe ky është realitet; Por, meqë duhet thënë diçka, mund t’ia kërkojë respektimin zyrtar të simboleve shtetërore të paktën në tokën e Ambasadës së Shqipërisë në Beograd meqë janë në mes edhe ca detyrime ndërkombëtare. Nëse Vuçiç nuk ia garanton as këtë siguri, të paktën mund ti kërkoj mosndërsimin e kriminelëve serbë në evente sportive, siç  bëri në palestër ku u zhvillua kampionati i boksit; Kjo kërkesë nuk është dhe ndonjë hata meqë edhe Putini respektoi flamurin e Kosovës në Moskë kur fitoi Majlinda Kelmendi në kampionatin e xhudos. Nuk kishte dhe nuk ka rus që e do shtetin e pavarur të Kosovës, ama kur flamuri i këtij shteti u valvit në kampionatin e xhudos në Moskë me urdhër të Presidentit të Rusisë, Vladimir Putin, nuk e fishkëlloi njeri! 

Ndryshe, nëse në të ardhmen e shihni flamurin shqiptar duke iu vënë flaka në Serbi, duhet ta keni të qartë se atë nuk po e djegin serbët. Në rastin më të keq, Presidenti i Serbisë, Aleksandar Vuçiç e ka përgatitur skenarin e mikpritjes së Kryeministrit të Shqipërisë, Edi Rama, në Beograd! Dhe në rastin më të mirë, ai nuk po i pengon të gjithë ata që duan ti vënë flakën flamurit të shtetit të Edi Ramës; Kjo, ndoshta edhe ka kuptim, për flamurin e shtetit të cilin Edi Rama e konsideron pjesë të Open Balkan dhe të gjithë serbët që duan ti vënë flakën flamurit të shtetit i cili për ta nuk ka pse ekziston pasi është pranuar si pjesë e Serbisë!

Dhe, nëse flamuri shqiptar valvitet i qetë në Ambasadën e Shqipërisë në Beograd, këtë situatë vetëm Edi Rama dhe Aleksandar Vuçiç nuk e kanë zgjidhë. Që të dy nuk kanë lidhje me qytetërimin!

Duhet ta keni të qartë se thejshtë ka pushuar së ekzistuar shteti i Edi Ramës!

Flamuri është i Republikës së Shqipërisë!