FRPD në “Foltore” Kryetari i PD shpall zgjedhjet, Basha: S’është e vërtetë!
Drafti për të përfshirë në ligjin antimafia nene kundër oligarkisë duke e lidhur me nismën e PD për vettingun e politikanëve ngeli lajm vetëm për Kryetarin e Partisë Demokratike pasi interesi i opinionit publik ishte nëse kishte shpall zgjedhjet në Forumin Rinor të Partisë Demokratike, pasi kryetari i FRPD, Belind Këlliçi vendosi të marrë pjesë në “Foltoren” e Berishës.
“Jo s’është fare e vërtet. Kjo është një sajesë e fabrikuar për interesa personale. Për herë të parë nën drejtimin tim, Forumi Rinor i Partisë Demokratike ka zhvilluar zgjedhje, madje zgjedhje një anëtarë një votë për kryetarin, si dhe zgjedhjen e forumeve drejtuese. Për fat të keq prej dy vitesh mandati i forumeve drejtuese dhe i kryetarit ka skaduar dhe në përputhje me normat demokratike, përsëri me një anëtarë një votë, të rinjtë dhe të rejat demokrate do zgjedhin përfaqësuesit e tyre duke përfshirë dhe kryetarin e ri,” tha Lulzim Basha ndërsa kishte dhe një sqarim nëse Kryetari i PD ka të drejtë për të shpallur zgjedhjet për një organizatë partnere:
“Është i njëjti proces që është ndjekur edhe në 2014-ën, ku për herë të parë është ndjekur parimi një anëtar një votë. Por vëmendja juaj sot duhet të përqendrohet edhe në një lajm tjetër që i shtohet vettingut të politikanëve, javën e ardhshme ne do të përparojmë me ligjin e formuluar prej kohësh, draftligjin e formuluar prej kohësh, për të përfshirë në kuadrin ligjor anti-mafia, pra në ligjin anti-mafia, edhe nene kundër oligarkisë.”
Dhe jo vetëm kaq! Kryetari i PD, Lulzim Basha u pyet dhe pse vendosi në këto momente për shpalljen e zgjedhjeve në FRPD duke pasur parasysh zgjedhjet lokale:
“Ne kemi shumë sfida përpara, por asgjë nuk mund të pengojë Partinë Demokratike që të zbatojë normat statutore të demokracisë dhe aq më pak interesat personale të pengojnë funksionimin e parimeve të tilla siç është zgjedhje një anëtarë një votë, që është një risi për të cilën Partia Demokratike është ballë lartë dhe unë si kryetar i saj, jam krenar.”
Në fund, pasi e pranoi se është krenar ndonëse dalngadalë partia nën drejtimin e tij po i shkërmoqet, Lulzim Basha foli dhe për PD-në nëse është gati për zgjedhje të pjesshme lokale pas vendimit të Gjykatës Kushtetuese:
“E para e punës të presim vendimet dhe zbardhjen e tyre. Padiskutim që atentati anti-demokratik i “30 qershorit” është pjesë e skemës së shkatërrimit të demokracisë nga rrëgjimi në fuqi dhe objektivi kryesor i Partisë Demokratike është të rikthejë Shqipërinë në një vend demokratik nga një regjim autokratik në të cilin është kthyer nën sundimin e Edi Ramës.”
