Të kërkojmë falje Mateo!
nga Luan Baçi*
Shumë dhimbje dhe shumë trishtim, lë pas për çdo njeri normal të këtij vendi të vogël dhe plot halle të mëdha!
E paimagjinueshme, e pabesueshme, e papranueshme, e paharrueshme, për prindërit, familjarët dhe të afërmit e tij, kjo ngjarje dhe krim makabër.
Ngushëllimet më të sinqerta dhe të thella, megjithëse nuk ka fjalë, që e ngushëllon këtë!
Monstra, që të mori jetën, megjithëse i njohur si i tillë, i dënuar si i tillë, vazhdonte të jetonte i qetë, në monotonin e zakonshme të jetës, afër njerëzve normal, afër ty Engjëll.
U desh të merrte jetën tënde të pafajshme në moshën 8 vjeçare, ta ndërpriste këtë jetë në mënyrën më barbare, dhe më makabre, që të vërtetohej si i tillë!
Ky monstër, ky përbindësh, i dënuar dhe më parë, për rrëmbim personi, i njohur nga banorët e zonës, si njeri problematik, i dhunshëm, qarkullonte me mjete prerëse të rrezikshme për jetën e të tjerëve, i denoncuar shumë herë të tjera nga banorët për veprime, jo normale dhe të rrezikshme, përsëri vazhdonte jetën i qetë, pranë njerëzve normal!
A nuk duhej që policia ta kishte nën survejim dhe kontroll këtë monstër të rrezikshme, që denoncohej herë pas herë nga banorët?
A nuk njihej e kaluara e tij problematike dhe e rrezikshme?
A nuk duhej bashkia apo institucione të tjera përgjegjëse të këtij shteti, të interesoheshin për një monstër të tillë, që jetonte i vetëm dhe pa asnjë ndihmë, se si e menaxhonte kohën e tij?
Ky krim makabër, nuk është rastësi, pas këtij krimi qëndron papërgjegjshmëria e shtetit, mos ekzistenca e tij!
Të gjithë ne duhet të kërkojmë falje për jetën tënde, të gjithë duhet të ndihemi fajtor, të gjithë duhet të reagojmë fuqishëm!
Qofsh i paharruar engjëll!
*Deputet i PD
