Shqetësim për azilkërkuesit, Tabaku-Hard: BE të nisë negociatat me Shqipërinë, jo se janë përmbushur kushtet…

Kryetarja e Komisionit të Integrimit, Jorida Tabaku në takim me ministrin e Jashtëm austriak, Michael Lin Hard, tha sot se Bashkimi Europian, BE, duhet të çelë negociatat me Shqipërinë jo se janë përmbushur kushtet por si një mjet monitorimi për vendin.

Me këtë rast ajo falënderoi shefin e diplomacisë austriake për mbështetjen e dhënë për Shqipërinë në procesin e integrimit europian si dhe ndihmën gjatë tërmetit të 26 nëntorit dhe pandemisë së COVID-19.

“Integrimi europian është një proces, i cili kërkon një strukturë përgjegjëse dhe për këtë qeveria nuk ka menduar gjatë këtyre viteve. Gjithashtu nuk ka një buxhet të dedikuar për të. Por Bashkimi Europian duhet të nisë negociatat me Shqipërinë, jo sepse janë përmbushur kushtet por si një mjet monitorimi për vendin,” tha Jorida Tabaku ndërsa u diskutua edhe tema e pashmangshme, rritja e numrit të azilkërkuesve nga Shqipëria.

“Gjatë viteve të fundit është rritur numri i azilkërkuesve nga Shqipëria. Ky ishte dhe shqetësimi i ngritur nga ministri i Brendshëm austriak, gjatë vizitës së tij në shtator të këtij viti,” e pranoi Kryetarja e Komisionit të Integrimit, Jorida Tabaku, por shtoi:

“Ligji i propozuar nga qeveria “Për të huaj” i jep mundësinë shumë qytetarëve nga vende të treta të përdorin vendin si urë kalimi drejt Shqipërisë.”