Rritja e aplikimeve për azil në BE, Basha: Korrupsioni, arsye madhore pse njerëzit largohen!
Pas publikimit të dhënave për aplikimet për azil nga zyra europiane e azilantëve, EASO, ku rezulton se Shqipëria ka tejkaluar dhe nivelet e para pandemisë ka reaguar Kryetari i Partisë Demokratike, Lulzim Basha, duke theksuar se një nga arsyet madhore pse njerëzit largohen nga vendi i tyre është korrupsioni dhe fundi i kësaj katastrofe bëhet duke thyer bashkëpunimin mes politikës, krimit dhe oligarkisë, që ka shkërmoqur demokracinë dhe po e bënë të pajetueshme për familjet shqiptare.
“Me përjashtim të një lufte civile, një nga arsyet madhore pse njerëzit largohen nga vendi i tyre është korrupsioni. Rritja e aplikimeve për azil në vendet e BE-së dëshmon edhe njëherë se masakra e 25 prillit nuk zgjidhi asgjë për shqiptarët,” thekson Lulzim Bashanë reagimin e tij përmes rrjetit social Twitter duke përfunduar:
“Fundi i kësaj katastrofe kombëtare, kërkon një përballje frontale me korrupsionin, duke thyer bashkëpunimin mes politikës, krimit dhe oligarkisë, që ka shkërmoqur demokracinë dhe po mbyt të ardhmen e Shqipërisë duke e bërë të pajetueshme për familjet shqiptare. Vetting në politikë.”
Ndryshe, aplikimet për azil nga shtetasit shqiptarë në një nga vendet e Bashkimit Europian shënuan një rritje të shpejtë në muajt e verës, duke tejkaluar dhe nivelet e para pandemisë. Sipas të dhënave nga EASO, zyra europiane e azilantëve, aplikimet për azil në muajin gusht arritën në mbi 1400, me një rritje prej 46% në krahasim me korrikun dhe më shumë se dyfishi në raport me muajin qershor. Në gusht, aplikimet ishin më të larta dhe se muajt e fundit përpara se të fillonte pandemia, dhjetor 2019 dhe janar e shkurt 2020.
