Dënim për blerjen e votave në Dibër, PD: Drejtësi e paplotë pa dënimin e organizatorëve!
Pasi GJKKO dënoi me nga 1 vit burg Denis Xholin dhe Albjon Cekun për blerje të votave në Dibër, ka reaguar Partia Demokratike përmes deputetes Dhurata Çupi Tyli, duke e konsideruar të paplotë drejtësinë me dënimin e 2 personave por duhet të shkojë tek i gjithë zinxhiri i vjedhjes së votave të shqiptarëve.
Kjo është masakra zgjedhore për të cilën PD kërkon hetim dhe drejtësi të plotë, thekson Dhurata Çupi Tyli dhe për këtë arsye drejtêsia duhet të veprojë.
“Se e ka vjedhur Rilindja pushtetin, jo vetëm e kam denoncuar gjate fushatës por edhe pas shpalljes së rezultatit. Ditën për diell, rilindasit të angazhuar me cdo formë për të mbajtur pushtetin, blenë vota, blenë vullnetin e lirë, ushtruan presion me heqjen e ndihmës ekonomike apo edhe duke ofruar vende pune të përkohëshme. Kjo që ka ndodhur në Dibër është vetëm maja e ajsbergut. Gjithcka ka qenë e orkestruar nga lart dhe me zbatim deri në cdo qelizë ku mund të merrej vota në çdo formë,” thekson deputetja e PD në reagimin e saj përmes rrjetit social Facebook duke përfunduar:
“Kjo është masakra zgjedhore për të cilën PD kërkon hetim dhe drejtësi të plotë. Për këtë arsye drejtêsia duhet të veprojë që nga organizatorët e kësaj masakre dhe për cdo person të përfshirë në këtë aferë të vjedhjes së vullnetit të shqiptarëve. Drejtësia është e paplotë me dënimin e 2 personave por duhet të shkojë tek i gjithë zinxhiri i vjedhjes së votave të shqiptarëve.”
Ndryshe, sot GJKKO ka dënuar Denis Xholin dhe Albjon Cekun me nga 1 vit burg për veprën penale “korrupsion aktiv” në zgjedhje në bashkëpunim.
Xholi dhe Ceku janë dënuar me 18 muaj, por për shkak të gjykimit të shkurtuar masa është shndërruar në 12 muaj heqje lirie.
Ky vendim i GJKKO ka ardhë pasi simpatizantët e Partisë Demokratike bllokuan më 22 prill të këtij viti në Maqellarë, mjetin me të cilin udhëtonin Denis Xholi e Abjon Ceku. Gjatë kontrollit të mjetit, policia gjeti 500 mijë lekë, materiale udhëzuese për të votuar dhe postera elektoral.
