Zhbllokohet rruga Prizren-Prevallë

Është zhbllokuar rruga Prizren-Prevallë e cila ishte bllokuar pasi rrëshqitjeve të dherave nga masivi shkëmbor në pjesën e sipërme të saj.

Për zhbllokimin e kësaj rruge ka njoftuar Ministria e Infrastrukturës e Kosovës, duke theksuar se trafiku mund të zhvillohet sikurse më parë.

“Ju informojmë se në rrugën Prizren – Prevallë, në kilometrin e gjashtë ku pati rrëshqitje të materialit erodues nga masivi shkëmbor në pjesën e sipërme të saj, dhe për pasojë bllokimin e kësaj rruge që nga mbrëmë pas orës 18.00 e deri me tani është bërë zhbllokimi i këtij aksi rrugor dhe trafiku mund te zhvillohet sikurse më parë,” thuhet në komunikatën e ministrisë duke i bërë thirrje drejtuesve të automjeteve që të kenë kujdes të shtuar kur lëvizin në këtë terren.

“Bazuar në konfiguracionin e terrenit ku shtrihet kjo rrugë, bëjmë thirrje tek të gjithë drejtuesit e automjeteve që të kenë kujdes të shtuar në të gjithë gjatësinë e saj, pra nga Prizreni deri në Prevallë. Kujdes duhet të bëhet nga ndonjë ramje eventuale e gurëve.”