Pa mëdyshje, Berisha nga Shkodra: Selinë e PD do ta çlirojmë nga bandat e Lulzim Bashës!

U prit në sallë shumë më të madhe se sa në Foltore, por as Palestra e Sportit “Qazim Dervishi” në Shkodër nuk mjaftonte për të gjithë ata demokratë shkodranë që ishin të interesuar për ta pritur liderin historik të Partisë Demokratike, Sali Berisha i cili me Komisionin e Rithemelimit të PD nisi turin e takimeve anëtarësinë e partisë.

Përkundër fitores së shpallur nga Lulzim Basha me paramiltarët dhe policët e Edi Ramës më 8 Janar, Sali Berisha siguroi demokratët se do ta çlirojnë shtëpinë e tyre nga bandat dhe blindet e turpshme.

“Demokratët në datën 8 janar nuk kërkonin asgjë tjetër veç atë që do bënte çdo qytetar i lirë, të nxirrnin banditët dhe bandën nga shtëpia e tyre. Kush është ai qytetarë që nuk kërkon të largojë banditët nga shtëpia. Ne atë seli do ta çlirojmë nga bandat dhe blindet e turpshme. Mos keni mëdyshje, kurrë ne nuk japim pluralizmin, demokracinë, PD-në, nuk shkelmojmë mbi interesat e Shqipërisë,” tha Sali Berisha duke ftuar nga kjo ditë flakën, dritën e këtij revolucioni ta çojnë në çdo votër të shqiptarëve dhe të rikthejnë edhe njëherë fitoren plebishitare të vitit 1992.

Takimin, Ish-Presidenti Sali Berisha e nisi me nderime për mbështetjen e jashtëzakonshme të shkodranëve ndërsa i ftoi të mbajnë një minutë heshtje për vdekjen e Ramazan Rragamit, që u ndje gjithë jetën krenar me Shkodrën dhe shkodranët.

“Dua të ndaj me ju një të vërtetë, që nga fëmijëria ime, besoj nga mosha 14-vjecare, dhe gjer sot, unë udhëtimin drejt Shkodrës e kam udhëtimin më emocional, më frymëzues, sepse Shkodra dhe shkodranët mbi të gjitha janë frymëzim. Shkodra ishte dhe mbetet në të gjitha kohërat bastioni i atdhetarisë. Poetë e shkrimtarë nuk arrijnë kurrë të shprehin madhështinë e shpirtit të këtij qyteti, kontributin e tij në histori. Askush nuk ka duruar me mijëra tortura, sa qytetarët shkodranë, vetëm për t’i thënë të vërtetës të vërtetë, për të mos u manipuluar e mashtruar.

Sot, ne mblidhemi në këtë stadium, në 32-vjetorin e demonstratës së parë të fuqishme anti-komuniste, me të cilën qytetarët e Shkodrës çliruan qytetin e tyre, detyruan regjimin të tërheqë bustin dhe kultin më të egër, më mizor e më barbar të shekullit XX, diktatorin Josif Stalini. Ky është një rast për t’u përulur me nderim para atij grupi, trima e guximtarë, të cilët mobilizuan, organizuan qytetin e mijëra qytetarë, të cilët mbushën sheshet kryesore të qytetit në një demonstratë që ushtoi fuqishëm në Shqipëri e mbarë botën. Ata i thanë botës se Shqipëria nuk do të mbetet kupa e Adriatikut, por do të bëhet vendi i qytetarëve të lirë. Shkodra do të paguante më gjakun e martirëve të saj,” tha lideri historik i PD para demokratëve shkodranë duke folur dhe për monizmin aktual që ka kapluar Shqipërinë:

“Sot kemi një narko-kryeministër, që shkelmon interesin kombëtar, që vendoset në aleancë me Beogradin kundër Kosovës e kombit shqiptar. Sot kemi një narko-kryeministër, i cili në 7 muaj me aeroplan privat, personal, shpenzon 2.2 milionë euro udhëtime, që të gjitha pa asnjë interes për asnjë shqiptar, përvec vetes së tij. Sot kemi një narko-kryeministër, i cili ka vendosur ligje konfiskimesh pronash, me të njëjtat standarde si në vitin 1946. Sot kemi një narko-kryeministër, i cili në një akt armiqësor ndaj lirisë së cdo shqiptari, mori peng, kapi për zverku, me korrupsion e metoda të tjera, njeriun që ne së bashku 8 vite e mbështetëm me gjithë zemër, me gjithë energjinë e forcën tonë, Lulzim Bravën. Ndaj dhe unë shfrytëzoj këtë takim, t’i bëj thirrje çdo shqiptari të ndalet e të mendojë, t’i bëjë vetes pyetjes ‘A duhet pluralizmi politik në Shqipëri?’ apo të pranojmë monizmin e shëmtuar, nga i cili vuajtëm më shumë se cdo komb tjetër i Evropës.”

Dhe, jo vetëm monizëm i shëmtuar! Një shtet, thekson Berisha, servirë për opozitë njeriun që rrethohet me banditë e policë dhe ndan me të afera korruptive ndërsa i mbyll dosje krimi.

“Ata që mund të mendojnë se krahasimi nuk është i drejtë, u them po çfarë mund të bëjë më shumë një narko-kryeministër, se sa të rrethojë në shtëpinë e demokratëve, me vrasës, trafikantë, të ashtuquajtur në krye të opozitës, të rrethojë me policë e të sulmojë demokratët në mënyrë më të egër, të pajisë bandën e tij me të gjitha mjetet e dhunës të policisë, e t’i vërsulë mercenarët demokratëve, se duan të hyjnë në shtëpinë e tyre. Nuk mund të krahasohet me asnjë vend tjetër, nuk ka ndodhur e nuk ndodhin kurrë në një vend të lirë zhvillime të tilla. A mundet një shtet të servirë për opozitë njeriun që rrethohet me banditë e policë, njeriun me të cilin ndan afera korruptive, i mbyll dosje krimi. Kjo ndodh vetëm në Shqipëri.”

Me këtë rast, lideri historik i Partisë Demokratike i bëri thirrje të gjithë demokratëve që mbështesin akoma Lulzim Bashën, që të heqin dorë prej tij pasi ai është turpi i dheut dhe i historisë.

“U drejtohem të gjithë atyre demokratëve, që akoma në mënyrën më të pabesueshme dëshmojnë mbështetjen më të vogël për Lulzim Bravën, hiqni dorë prej tij. Hiqni dorë, se ai është turpi i dheut, turpi i historisë. U them deputetëve të Shkodrës, bashkohuni me qytetin tuaj. Ndahuni nga Lulzim Basha, se atë e pret vrima e miut nga ky revolucion që nuk ka të ndalur. Askush nuk ka të drejtë të luajë me pluralizmin politik në Shqipëri,” tha lideri historik i Partisë Demokratike, Sali Berisha duke shtuar se ata që mbështesin Bashën për kryetar opozite, ata tallen me përçmim ndaj shqiptarëve ndërsa përfundoi:

“Shqiptarët që mbështesin Bashën, tallen me lirinë, me vlerat e pluralizmit, me pluralizmin politik në Shqipëri!”