Nga Patosi, Berisha: Edi Rama tejkaloi baballarët, mori peng opozitën me dosje krimi

Sot Edi Rama tejkaloi baballarët e tij, mori peng opozitën me dosje krimi dhe afera korruptive, tha lideri historik i Partisë Demokratike, Sali Berisha, me rastin e 31 vjetorit të PD Dega Patos duke e bërë të qartë se demokratët janë të angazhuar në një revolucion paqësor që nuk ka forcë ta ndalë.

Para demokratëve të Patosit, Ish-Presidenti Sali Berisha tha se sistemi i drejtësisë në vend është i kapur, ndërsa kishte një mesazh edhe për Ambasadoren amerikane në Tiranë Yuri Kim.

“Sot ky përvjetor është një kushtrim i madh për çdo demokrat për të hedhur mënjanë diktaturën e drogës që është instaluar në Shqipëri. Sot Edi Rama ka pushtet 10% më shumë se sa kishte Ramiz Alia në vitin 1991. Me të gjitha vështirësitë mbetem opozitë e vërtetë dhe ecëm drejt fitores.

Sot Edi Rama tejkalon baballarët e tij, merr peng opozitën me dosje krimi dhe afera korruptive. Kjo është një mënxyrë për vendin por edhe një thirrje për çdo demokrat. Nuk e kemi të lehtë por kauza jonë është e drejtë dhe do të triumfojë sepse ne besojmë në këtë kauzë sepse ne jemi të angazhuar në një revolucion paqësor që nuk ka forcë ta ndalë,” tha Sali Berisha duke shtuar:

“Shtrojani pyetjen çdo demokrati, me cilin je ti me Lul Bravën e 4 hajdutëve që ka shitur selinë për të ndërtuar pallate, bashkë me Edi Ramën dhe Erion Veliajn, e për këtë shkak mbyll dyert e nuk lejon demokratët në shtëpinë e tyre. Me cilin je ti, me Pallat Kapllanin që fiton gjatë qeverisjes së PS dhjetëra milionë euro e pastaj vjen e prish shtëpitë e fukarenjve, e njerëzve të varfër në Tiranë, për të ndërtuar pallatin e milionave së bashku me Lulzim Bashën. Këta janë gjakpirës, çdo euro e çdo pasuri e kanë vendosur mbi gjakun, mundin dhe djersën tuaj. Këta janë hajdutë, asgjë më shumë.

I drejtohem Pallat Kapllanit. Pallat si i fitove ti 32 mln euro me bashkitë socialiste këtë periudhë? Sa pagove? Çfarë ryshfeti dhe? E tani do të na hiqesh për demokrat. Ti je një korruptokrat, e je një turp që duhesh të largohesh menjëherë nga PD. Vjen e bëhesh vegël e Lul Bravës. Sigurisht, ka rrezik të ketë marrë ndonjë pallat edhe te parku i 4 hajdutëve,” u shpreh Ish-Presidenti Sali Berisha duke vlerësuar se Edi Rama e Lulzim Basha janë në garë:

“Edi Rama dhe Lulzim Brava janë në garë se si të shtypin më shumë votën e lirë dhe liritë tuaja. Me cilin je ti i dashur demokrat? Me atë që u hedh gaz helmues, e bomba shurdhuese votuesve të tij apo je me demokratët të cilët duan të qëndrojnë si opozitarë të vërtetë që duan të luftojnë kundër një regjimi të bazuar në drogë e krim,” tha Berisha gjithsesi duke e konsideruar Edi Ramën kreun e meduzës.

“Edi Rama është kreu i meduzës dhe një armik i egër i shqiptarëve në 8 vite ka shpërdoruar 8.2 miliardë euro. Shikoni çfarë bën me një institucion që i ka mbetur pa kapur, përdor tritolin , SPAK dhe të gjitha mjetet legjitime në vend që të presë zgjedhjet. problemi i Berishës është tërësisht personal , kam hapur padi për shpifje. Ju garantoj se edhe 100 vite nuk kanë për të gjetur prova për shpifjen që kanë ngritur ndaj meje. Por nga ana tjetër kjo është një motiv që unë të vazhdoj betejën,” tha Sali Berisha ndërkohë për Ambasadoren Kim, tha ai, që kalon nga Sekretare ideologjike e PS kalon në zëdhënësen e Bravës, kam dy fjalë:

“Në këtu jemi jemi pro-amerikanë dhe mirëpresim investitorë amerikanë, por theksoj që kompania më e fuqishme amerikanë që ka ndërtur në Shqipëri ishte Bektel dhe ajo fitoi rrugën e Kombit me një tendër ndërkombëtar ku morën pjesë 7 kompani. I them të mos inkurajojë prokurime direkte në këtë vend. Nëse jeni e interesuar për luftën kundër korrupsionit dhe rritjen e investimeve të huaja insistoni në tendera të hapura. Imun ndaj korrupsionit nuk është askush,” tha lideri historik i PD para demokratëve të Patosit duke folur dhe Raportin e fundit të Transparency International:

“Sot Shqipëria u ngjit edhe 6 shkalla për korrupsion. Këto janë rezultat i shkatërrimit të sistemit të drejtësisë. Reforma solli dy pasoja, ju e humbët të drejtën e një procesi gjyqësor dhe po ashtu ka mijëra dosje të kriminelëve që nuk hapen fare sepse nuk ka prokurorë. Është përgjysmuar numri i prokurorëve.”

Me këtë rast, lideri historik i PD, Sali Berisha, këto 8 vite i vlerësoi si vite regresi ndërsa kujtoi shkatërrimin e shtëpive të banorëve të Patosit për të cilin shkatërrim akuzoi George Sorosin.

“Nafta, nga një faktor pasurimi për ju, u shndërrua në faktor fatkeqësie për ju. Të gjithë i kemi parasysh shpërthimet në Patos Marinzë, shkatërrimet që sollën. Por shkatërrime shumë më të mëdha sollën në shëndetin e njerëzve. Qëndrimi ishte armiqësor, çnjerëzor. Jo vetëm që qeveria nuk qëndroi në anën tuaj, por bëri gjithçka qëe ta mbyllte problemin dhe pa dëmshpërblime. Bëri gjithçka të falsifikonte analizat, të cilat tregonin lëndë toksike të dëmshme për shëndetin e banorëve. Bëri gjithçka të fshihte autorët vetëm se ata ishin miq të kreut të Meduzës.

Mediat informuan se pas kompanisë qëndronte multimiliarderi George Soros. Një numër raportesh nga mediat u publikuan, por qeveria injoroi çdo gjë. Në një veprim antiqytetar, antipopullor, hoqi rentën. Renta është detyrim ndërkombëtar. Shqipëria u anëtarësua në organizua në organizatën ENTI të OKB.

Kjo i detyron kompanitë e naftës që të jenë sociale, të kujdesesn për komunitetin, të investojnë. Kjo organizatë i detyron qyeveritë që një pjesë të mirë të rentës të mos e marrin vetë por t’ua lënë qeveritarëve vendorë. I tillë ishte ligji që bëmë ne. Kush përfitoi nga heqja e rentës? Të gjitha paratë shkuan në xhepat e milionerëve. Kjo qeveri ndan paratë me ata, pasi përndryshe nuk do ta hiqte kurrë. Jo vetëm u hoq renta, por po çmontojnë, në vend që të investonin, po e kthejnë në skrap rafinferinë, pasi vodhën qindra milionë euro.”