Kërkesa për regjistrimin e Koalicionit “Shtëpia e Lirisë” dorëzohet në KQZ

Koalicioni “Shtëpia e Lirisë” ka depozituar sot kërkesën në Komisionin Qendror të Zgjedhjeve, KQZ, për regjistrim në zgjedhjet e pjesshme vendore të 6 marsit.

Kërkesa është dorëzuar nga Lëvizja Socialiste për Integrim, sigluar nga Sekretari i Përgjithshëm i LSI, Endrit Braimllari.

Kështu, tashmë zyrtarisht Koalicionit “Shtëpia e Lirisë” përbëhet nga Lëvizja Socialiste për Integrim, Partia Demokratike e Shqipërisë – Komisioni i Përkohshëm i Rithemelimit dhe Partia Demokristiane.

Ndëkohë është publikuar edhe Marrëveshja për krijimin e Koalicioni “Shtëpia e Lirisë” e cila është sigluar nga Flamur Noka në emër të Komisionit të Rithemelimit të PD, Endrit Braimllarit nga LSI dhe Nard Ndoka nga PDK.

Marrëveshja

“Sot më datë 31.1.2022, ne partitë politike të mëposhtme:

Ne po bashkohemi, si parti dhe si qytetarë, për t’i sjellë ndryshimin Shqipërisë.

Të gjithë e dimë që duhet ndryshim. Shqiptarët janë të fortë. Shqipëria është e fortë. Ka vetëm një njeri përgjegjës për dështimin e Shqipërisë në 8 vitet e fundit dhe ky është Edi Rama.

Ne po ndajmë të njëjtat vlera e parime politike, si edhe në vizionin për qeverisjen e vendit.

Dëshirojmë të koordinojmë angazhimet dhe kontributin për fitoren e përbashkët politike dhe prandaj

Vendosëm që:

Të formojmë një koalicion të gjerë opozitar dhe për të konkuruar së bashku në zgjedhjet e pjesshme për kryetar bashkie në Bashkitë Shkodër, Dibër, Durrës, Rrogozhinë, Vorë dhe Lushnje, të datës 6 mars 2022

Emri i koalicionit është “Shtëpia e Lirisë”

Shkronjat nistore të koalicionit do të jenë “SH-L”.

Sigla e koalicioni është:

Drejtuese politike e Koalicioni është Partia Demokratike e Shqipërisë – Komisioni i Përkohshëm i Rithemelimit.