Liderët e BE-së me sanksione të reja për Rusinë

Liderët e Bashkimit Evropian, BE, kanë ra dakord që të vendosin sanksione ndaj Rusisë, që sipas tyre do të kenë pasoja masive dhe të rënda. Sanksionet janë kundërpërgjigje ndaj pushtimit barbar të urdhëruar nga presidenti rus, Vladimir Putin, tha blloku evropian.

Sanksionet, raporton RFE, godasin sektorin financiar, atë të energjisë dhe të transportit. Gjithashtu janë vendosur kufizime mbi eksportet dhe financimin si dhe është shtuar lista paraprake me emra të rinj të individëve rusë.

Liderët e 27-anëtareve të BE ranë dakord për vendosjen e sanksioneve gjatë një Samiti urgjent që mbajtë sot në Bruksel, prej ku bën thirrje për dënimin e pushtimit.

Në deklaratën e Samitit, liderët e BE-së thanë se raundi i ri i sanksioneve do të shkaktojë pasoja masive dhe të rënda mbi Rusinë për shkak të veprimeve të saj duke shtuar se sanksionet e vendosura janë koordinuar me partnerët dhe aleatët.

BE synon që të ngrijë asetet ruse që mbahen brenda bllokut dhe t’ua ndalojë qasjen bankave ruse në tregjet financiare evropiane.

Shefi i diplomacisë së BE-së, Josep Borrell tha se kjo është pakoja më e ashpër e sanksioneve që ne kemi zbatuar ndonjëherë.

“Sanksionet tona do ta dëmtojnë në thelb ekonominë ruse,” tha kryeministri belg, Alexander De Croo.

Megjithatë, ende nuk dihen detajet mbi sanksionet, përfshirë nëse BE-ja ka vendosur që ta largojë Rusinë nga sistemi i transferimeve bankare, SWIFT

Liderët e BE-së, raporton RFE, u shprehën se duan të vendosin sanksione edhe ndaj Bjellorusisë, për shkak të lidhjeve të ngushta të saj me Rusinë.

Ndryshe, më 23 shkurt, BE vendosi raundin e parë të sanksioneve, duke sanksionuar ligjvënës rusë, zyrtarë qeveritarë dhe biznese.

Ministri i Mbrojtjes së Rusisë, Sergei Shoigu, një këshilltar i lartë i presidentit Vladimir Putin dhe të gjithë 351 ligjvënësit që votuan për njohjen e Donjeckut dhe Luhanskut si shtete të pavarura, janë në mesin e personave të sanksionuar në rundin e parë të sanksioneve të bllokut evropian.