OBSH: Disa shtete evropiane hoqën brutalisht masat kundër COVID-19
Dhjetëra shtete evropiane, përfshirë Gjermaninë, Francën, Italinë dhe Britaninë, kanë hequr kufizimet për COVID-19 në mënyrë shumë brutale dhe tani po përjetojnë një rritje të rasteve, me gjasë për shkak të variantit më të transmetueshëm BA2, tha sot Organizata Botërore e Shëndetësisë.
Drejtori për Evropë i OBSH-së, Hans Kluge, tha në një konferencë për media në Moldavi, se ishte optimist, por vigjilent për zhvillimin e pandemisë në Evropë, raporton RFE.
Sipas tij, rastet me sëmundjen COVID-19 janë rritur në 18 nga 53 shtetet në rajonin evropian.
“Shtetet që veçanërisht po shohin rritje të rasteve janë Mbretëria e Bashkuar, Irlanda, Greqia, Qipro, Franca, Italia dhe Gjermania,” tha Kluge.
Shkaktari kryesor për rritjen e rasteve me gjasë është varianti BA2, tha Drejtori për Evropë i OBSH-së, Hans Kluge, që sipas ekspertëve është rreth 30 për qind më ngjitës, por jo më i rrezikshëm, sesa varianti paraprak BA1.
Por, “këto shtete po heqin kufizimet brutalisht, duke shkuar nga shumë masa në pak”, tha ai.
Sipas të dhënave të OBSH-së, numri i rasteve të reja me koronavirus ka rënë në Evropë, pas pikut të arritur në fund të janarit, por është shënuar një rritje e rasteve në fillim të marsit.
Gjatë javës së fundit janë regjistruar mbi 5.1 milionë raste dhe 12,496 vdekje në rajonin evropian, tha OBSH-ja. Në total, që prej fillimit të pandemisë janë regjistruar pothuajse 194.4 milionë raste dhe mbi 1.92 milion vdekje.
