Princ Leka President, gozhda e Nastradinit Edi Rama!
nga Agim Popoci
Show presidencial të cilin Kryeministri Edi Rama e filloi me përdhosjen e emrave të cilët preferohen për President të Republikës, përfshinë shkarazi edhe një emër i cili u cilësua vetëm si njëri nga ata me të cilët luan Rama si mjeshtër i manipulimit të opinionit masiv, Princin Leka!
Por, Princi Leka, nuk është vetëm një emër i cili i duhet Edi Ramës për këtë show presidencial, por është gozhda e fundit me të cilën ai mund të largohet nga qeverimi që i bëri kësaj lagje ballkanike të të marrëve, që i lejuan të ulet si në fronin e kryetarit të kryeqytetit ashtu dhe atij të kryeministrit shqiptar!
Pse Edi Ramës i duhet Princ Leka, President i Republikës!
Edi Rama si Kryetar i Bashkisë Tiranë, tjetërsoi trashëgiminë e këtij qyteti sa nuk la qoftë dhe një simbol që mund ta identifikojë me kaluarën e këtij qyteti, i cili pranoi dhe e mirëpriti gjithë llumin komunist të këtij vendi, duke përfshirë dhe familjen e vetë Ramës!
Sot, edhe atë Pazarin që e la pa e shkëmbyer me pallate, e ka tjetërsuar aq shumë me bojë dhe hekur sa që edhe e vetmja aromë e mbetur e qofteve të famshme të Metit, mbytet mbi marifetet e vrasësit të këtij qyteti, që është një dhe i vetëm, Edi Rama!
Krimi që Edi Rama bëri me Rrugën e Durrësit, nuk ka Gjykatë, nuk ka Hagë, nuk ka OKB që ta shpëlajë, në mënyrë që tregtarët e saj ti kthehen qetësisë dhe normalitetit, meqë banorët e saj u dorëzuan që me fadromat e para të këtij nastradini!
Të njejtën gjë e bëri dhe me Bulevardin Zogut, vetëm se këtu i doli një problem jo i vogël për manjakërinë e tij! E ndau në copa, e tjetërsoi por deri në mbylljen e plotë të tij dhe thyerjes me betonin e përçudnuar mbi Sheshin Skenderbej, çdo vizitor i huaj mrekullohej kur shikonte Universitetin e Tiranës nga Stacioni i Trenit, dhe me pyetjen retorike mbi autorin, merrte përgjigjen e cila aq shumë hallakat trurin e Edi Ramës, sa as Mentor Petrela nuk i bënte derman:
-Mbreti Zog!
Futi duart në të gjitha lagjet e Tiranës, nuk lejoi që nuk lejoi Kryegjyshin Botëror Dede Reshat Bardhin ta ndërtoj selinë e Kryegjyshatës në pronën e bektashinjve pas Hotel Dajtit, ndaloi pushtetin e Berishës ta rrëzoi Piramidën e kriminelit Enver Hoxha dhe u nisë në pushtetërimin e tij duke përdhosur Rilindjen.
Rilindja, siç e pagëzoi koalicionin e tij qeverisës, jo vetëm që erdhi në pushtet por denigroi një epokë të tërë me të cilën mburrej çdo shqiptar! Dhe, për pak muaj të vitit 2013, shqiptarët filluan të dëgjojnë për rilindasin Saimir Tahiri aty ku orë e çast përmendej Ismail Bej Vlora; Tom Doshi na u bë rilindas aty ku ishte Dom Nikoll Kaçorri, Pjerin Ndreu “fshiu” Abat Preng Doçin, Damian Gjiknurin e lidhi me Dibrën por i tha se përveç vjedhjes së votave duhet ta fshijë nga faqja e dheut simbolin shqiptar, Haxhi Vehbi Dibrën; Taulant Ballës i vuri një samar të madh ama e kishte rilindas socialist me mision për t’a mbuluar Konstandin Kristoforidhin e madh; Erion Velinë e konvertoi në humanist duke e çuar ministër të çështjeve sociale ama e kishte për detyrë rilindase që edhe ata drogaxhinjtë e Petro Nini Luarasit ti bëjë më të famshëm se rilindasin shqiptar që për shumë pak kohë rinia socialiste filloj ta identifikoj vetëm me shkollë; Dhe, u kujdes edhe për vajzat shqiptare që për model kishin Dora d’Istrian duke ua sjellë Erisa Spiropalin, atë që e di se kush është Skenderbeu, kush Plaku Mere e kush Mato!
Për vete, Edi Rama nuk kishte të ngjashëm, herë me çitjane herë me kostum me atlete ama gjithmonë i çmendur, pa pikën e lidhjes as me shqiptarë as me grekë, as me turq as me amerikanë, por gjithsesi lideri i rilindjes së re!
Dalëngadalë kjo lloj rilindje kriminale filloi të zinte të vend, nga ana tjetër Edi Rama filloi ti bëjë 100 bashki me shijen e tij, duke i ndryshuar identitetin edhe më rrënjë. Ndonëse kjo ishte një lëvizje që ishte praktikuar në Tiranë, ajo nuk u vërejt nga banorët deri në momentin kur gjithë këto bashki filluan të identifikohen me emrin e Edi Ramës!
Me raste u rikthye në Tiranë, për ta bërë Xhaminë e Madhe jo siç ishte parashikuar në kohën e Sali Berishës, dhe kryeqytetin shqiptarë ashtu siç e kishte menduar që në kohën kur ishte në krye të Ministrisë së Kulturës, pa Teatër Kombëtar dhe pa Kullën e Sahatit! Teatrin e fshiu, Xhamisë së Madhe i hoqi një pallat që kishte në krah për ta identifikuar me veten, ashtu siç bëri me Kullën e Sahatit të cilës i shtoi një pallat që të mos çuditet mileti përderisa këtë e bëri Edi Rama!
Për ata që u ankuan për të zitë e ullirit që vuanin në Vlorë, u bëri një surprizë për t’u treguar se çfarë është vuajtja. Nga bregdeti shqiptar me katër korsi iu serviri një Lungomare me dy korsi makinash, për ta zgjidhur njëherë e mirë konceptin e vuajtjes, të zezës dhe ullirit.
Rrëmujën me pronat që shkaktuan komunistët dhe e morën në dorë ustallarët e sigurimit gjatë tranzicionit, mendoi ta zgjidhë me Artan Lamen, por e kuptoi një të vërtetë që po e ndiqte këmba këmbës që nga historia e tij familjare:
-Zogu bëri shtetin shqiptar!
Duke menduar se si është e mundur që pas gjithë këtij tjetërsimi nuk arriti të krijoi qoftë dhe opinionin se Edi Rama bënë shtet, u bë edhe më keq kur nga krerët e administratës që emëronte, po vinin gjithnjë e më shumë konstatime se Administratë Shtetërore kishte vetëm gjatë kohës së Mbretit Zog!
Dhe jo vetëm kaq! Rilindjen e degjeneroi deri në ekstrem, periudhën e komunizmit e ngriti në nivele shumë më të larta të diktaturës me bijtë e sigurimsave, që përveç se janë shumë më të frikshëm janë dhe më besnik ndaj liderit, Serbinë e instaloi në Shqipëri ashtu siç nuk e kishte menduar as krimineli Enver Hoxha, arkitekturën e qyteteve shqiptare e shndërroi në arkitekturë të Edi Ramës duke përfshirë këtu dhe Bulevardin e Zogut, ishin këto konstatime të shumë pranuara jo vetëm nga bashkëpunëtorët por edhe rivalët e tij, por ishin po këta që me dëshmi i vërertonin se ishte Mbreti Zog që bëri shtetin shqiptar!
Shumë koka rilindëse të këtij shkatërrimtari të shtetit e lodhën kokën si t’ja bëjnë me këtë realitet të historisë shqiptare, por vetëm një kokë të krisur ka kombi shqiptarë që kënaqet vetëm kur e fshinë nga faqja e dheut edhe këtë realitet, siç bëri me trashëgiminë shqiptare, e ky është dora vetë Edi Rama!
Gjeti gozhdën që do ta ngulë për ti dhënë fund një herë e mirë monarkisë shqiptare, Princ Leka, President i Repubikës!
Nuk është e mundur, nxituan të deklarohen shumë shqiptar kur u shfaq emri i tij me arsyetimin se është pretendent i fronit mbretëror shqiptar!
Por kjo nuk e pengon Princ Lekën nëse heqë dorë nga froni, dhe nuhatja e Edi Ramës i thotë se ky kishte heqë dorë nga shumë gjëra që një pretendent nuk i bënë me asnjë çmim!
A do ta fshijë këtë realitet shqiptar Edi Rama me votat e mjaftueshme që ka për ta zgjedhur Presidentin e Republikës, kjo sot nuk varet nga Rama por nga Princ Leka!
Nëse konformizmi i Princ Lekës prevalon mbi trashëgiminë e Ahmet Zogut që e krijoi me shumë sakrifica, ky do të jetë fundi i trashëgimisë së fundit të cilën deri më sot nuk e fshiu nga faqja e dheut, Edvin Kristaq Rama! Dhe, mandati pesë vjeçar i Presidentit të Republikës do ti mjafton propagandës së Edi Ramës që me dy këmbët historinë e pabesueshme me arin që vjedhi Mbreti Zog ta zëvendësoj me Mbretërinë qesharake nga e cila heq dorë pretendenti, për t’u bërë President i Republikës!
Por, nëse Princ Leka i reziston terrorit komunist dhe do të qëndroj ashtu i kryqëzuar si paraardhësit e tij pa shpi e katandi, dhe nuk do të pranoi ofertën e pistë për President të Republikës, atëherë pak rëndësi ka gozhda e Edi Ramës dhe ku ngulet!
Shqipëria që tjetërsoi Edi Rama është e pamundur të kthehet në identitet, gjithsesi do të vazhdoj të jetoj si shtet të cilin e krijoi Mbreti Zog!
