Raporti i Reporterëve pa Kufij/ Reagimi, Edi Rama: Çfarë gënjeshtre!
Pas publikimit të Raportit të “Reporterëve pa kufij” në Ditën Botërore të Lirisë së Shtypit, ku Shqipëria radhitet në mesin e vendeve problematike duke shënuar rënie për 20 vende, ka reaguar Kryeministri Edi Rama duke i cilësuar konstatimet e këtij Raporti si gënjeshtra, fantazi, madje edhe tallje!
“Gazetarët viktima të dhunës policore në Shqipëri? Çfarë gënjeshtre! Gazetarët kritikë ndaj qeverisë përballen me sulme politike? Çfarë fantazie! Vetërregullim etik në median shqiptare? Çfarë talljeje! Vetëm titulli mungon: Ankesa për mungesën e lirisë ngaqë s’dimë ç’të bëjmë me lirinë!,” thekson Kryeministri Edi Rama në reagimin e tij përmes rrjetit social Twitter i cili është dakord vetëm me raportet dhe sondazhet që i bënë vetë ama duke e thënë edhe një të vërtetë:
“Në Shqipëri s’ka as media të intimiduar, as gazetarë të penguar në lirinë e tyre. Madje në Shqipëri ka gjithnjë e më shumë viktima të shpifjeve,gënjeshtrave e lajmeve të rreme! Flitet për gjyqe me gazetarë, kur në fakt s’ka! Flitet për ligjin antishpifje kur në fakt s’ekziston!”
Po natyrisht që nuk ka media të intimiduara kur intimidohen pronarët e mediave që për taksiratën e popullit shqiptar janë klientel e qeverisë që urdhërojnë transmetimin e të gjitha broçkullave që urdhërohen përmes celularit!
Në fund, Kryeministri me këtë bindje nuk ka se si ta përfundoj ndryshe këtë reagim përveç se kështu:
“E di që edhe ky opinion i imi do klasifikohet si sulm, presion, agresion kundër mediave, por e kam të pamundur të hesht kur shoh se si tallen disa me lirinë e fjalës dhe se si liria e shtypit bëhet liri e shtypjes, duke shkelur mbi faktet, njerëzit dhe vendin,në emër të saj!|
Ndryshe, në Raportin e Reporterëve pa kufij ku përfshihen 180 shtete, Shqipëria radhitet në vendin 103-të duke shënuar një rënie prej 20 vendesh krahasuar me vitin paraprak kur renditej ne vendin e 83-të.
Në Raport thuhet se ndërsa pavarësia editoriale kërcënohet nga rregullimi partiak i medias, integriteti fizik i gazetarëve cenohet nga krimi i organizuar, nga dështimi i shtetit për t’i mbrojtur ata dhe madje edhe nga dhuna policore.
Mediat private shqiptare më me ndikim zotërohen nga një grusht kompanish që kanë lidhje me politikanë. Gazetarët përballen me trysni politike që u përkeqësua në vitin 2021 nga përpjekjet për të kontrolluar informacionin gjatë zgjedhjeve parlamentare dhe pandemisë së COVID-19.
Klasa politike, thuhet në raport, kërcënon pavarësinë e redaksive nëpërmjet institucioneve shumë të politizuara të rregullimit të medias dhe menaxhimit të medias publike dhe se gazetarët kritikë ndaj qeverisë përballen me sulme të rregullta politike që synojnë t’i diskreditojnë ata dhe kanë vështirësi t’i qasen informacionit publik.
Raporti vë re se e ashtuquajtura paketë anti-shpifje, e cila do t’i jepte shtetit pushtet mbi përmbajtjen e mediave online dhe do të përforconte autocensurën, ende nuk është hequr qartazi nga agjenda politike, megjithëse versioni i saj fillestar është kritikuar nga Këshilli i Evropës, Bashkimi Evropian, të cilit Shqipëria dëshiron t’i bashkohet dhe nga organizatat ndërkombëtare për lirinë e shtypit.
Ata që që hetojnë krimin dhe korrupsionin janë veçanërisht të kërcënuar, thuhet në Raport në të cilin nënvizohet se gazetaret përballen me ngacmime në internet dhe në disa raste me diskriminim me bazë gjinore në redaksitë, një fushë e cila megjithatë ka shënuar përparim. Vetëcensura është e përhapur, por pavarësisht këtij kërcënimi ndaj pavarësisë së tyre editoriale, mediat krijuan një platformë për vetërregullimin etik, e para e këtij lloji në Shqipëri.
Rrjetet e organizuara kriminale nuk paraqesin rrezikun e vetëm për sigurinë fizike të gazetarëve, thuhet në raportin e Reporterëve pa Kufij. Mosndëshkimi i krimeve të kryera kundër gazetarëve, i kombinuar me përpjekjet politike për t’i diskredituar ata, krijon një klimë dhune që mund të nxisë sulme të reja. Në vitin 2021, gazetarët që mbulonin protestat dhe operacionet e zbatimit të ligjit pësuan disa akte të dhunës policore.
