Putini në Ukrainë, shkompleksim për shqiptarët mbi përplasjet e qytetërimit!

nga Agim Popoci

“Gabimi më i madh i Perëndimit në Kosovë ishte mospërfshirja e Rusisë!” Kështu u shprehë në vitin 2002 në një intervistë për “Bund”, krijuesi i teorisë dhe autori i librit të famshëm “The Clash of Civilizations“ /Lexo shqip: Përplasja e qytetërimeve/, Samuel P. Huntington, duke shtuar se se NATO është dashur të përpiqet, që bashkë me rusët të krijojë një politikë të përbashkët kundër Millosheviçit e meqë Aleanca Veriatlantike nuk e ka bërë, deri diku me të drejtë rusët janë zemëruar me Perëndimin dhe dërguan brigadat e tyre në Kosovë.

Meqë doli nga goja e njeriut, hipoteza e të cilit ishte në jetë, se lufta në të ardhmen nuk do të bëhet në mes të shteteve por në mes të kulturave, dhe se ekstremizmi islamik do të jetë kërcënimi kryesor në botë, kompleksoi të gjitha ata që kritikoheshin nga Perëndimi dhe kishin mbi supe vlerat islame, edhe pse ishin të shenjta!

Në mungesë të qasjes serioze ndaj kësaj dukurie, kur në Afganistan po zhvillohej pikërisht një luftë sipas parametrave të Huntigtonit, edhe shqiptarët iu nënshtruan arsyetimit për çdo dështim se nuk na do Perëndimi, duke ju referuar teorisë së “përplasjes së qytetërimeve”.

Parlamenti Evropian me eurodeputetë nga fshatrat më të çuditshme të Evropës, përforcoi këtë ide kur Turqia me MSA-në e saj u konsiderua si fundi i botës ashtu si dhe integrimi në BE.

Duke e ngatërruar përplasjen në mes të dy Perandorive me atë të qytetërimeve, shqiptarët në Ballkan filluan në mas të madhe ti asryetojnë “bllokimet” e veta në proceset euro-atlantike për shkak të përkatësisë fetare, që, Perëndimi nuk e do.

Rasti i Maqedonisë me Greqinë, i dha një goditje të fortë teorisë së Huntigtonit ndërsa në Ukrainë e rrëzoi për toke, jo vetëm duke i bërë të qartë shqiptarëve se si bëhet lufta, por edhe pse u rishfaq “The Clash of Civilizations“, paralajmërim ky që duhet ndryshuar qasjen “e qytetërimit” jo vetëm me Perëndimin por edhe me veten.  

Lufta që nuk u analizua

Deri sa Huntigton kishte një teori mbi gabimet e Perëndimit me Rusinë në luftën e Kosovës, Kosova nuk e kishte një analizë ose studim të mirëfillt se si erdhi deri tek kjo luftë dhe si duhet ti qaset Kosova aleatëve të saj.

Çlirimtarët u morën me çiftelia, studiesit e rinjë shqiptar u morën me përmbajtjen e këtyre folkloreve ndërsa u mjaftuan me arsyetimin se gjenocidi i Millosheviçit ishte arsyeja kryesore e kësaj ndërhyrje humanitare.

Shkëndija që rindezi Huntigton duke mohuar dhe gjenocidin nuk u përfill nga shqiptarët që u mjaftuan mbi “urrejtjen që ka Perëndimi ndaj islamit” dhe konfirmimin se ajo që po ndodhte në Afganistan, ishte shkruar e zeza mbi të bardhë në “The Clash of Civilizations“, dhe ishte refren i dëgjuar shumë shpesh në Parlamentin Evropian dhe disa nga parlamentet kombëtare të shteteve anëtare të BE mbi rrezikun e Turqisë në familjen evropiane.

Po, ulur në odë duke pirë çaj dhe duke parë në televizion aksionet e ushtrisë me aleatët e saj duke ndjekur Bin Ladenin nëpër shpellat e Tora Borës, mund të sjellë ndjenja të përziera nëpër zorrët nga ku vërdalloset çaji, të nxitë edhe zemërim musliman, për të cilën shkruante Bernard Lewis në shtatorin e vitit 1990 në “The Atlantic Monthy”  mbi “Rrënjët e zemërimit të muslimanëve”, para se Huntingtoni ta shprehte idenë e tij për herë të parë në artikullin në “Foreign affairs në vitin 1993, por pamjen e ke krejtësisht ndryshit kur hap dritaren dhe dëgjon krismat në Preshevë apo edhe Haraçinë!    

Në mungesë të analizës së mirëfilltë të luftës së Kosovës, shqiptarët ishin konfuz për zhvillimet në luftën e Luginës së Preshevës dhe  në Maqedoni, ndonëse kishte ca pika loti të përplasjes së qytetërimeve që i ngatërronte Huntigton në librin e tij.

Ndonëse në pamje të parë, nuk ishte luftë në mes të shteteve por qytetërimeve, si Huntigtoni në vitin 1993 ashtu dhe Basil Mathews në vitin 1926 ose Alber Kamy në vitin 1946, nuk kishin të bënin me shqiptarët, aq më shumë islamin e tyre, dhe kjo analizë nëse asgjë tjetër nuk do ti kompleksonte në zhvillimet e tyre euroatlantike.

Por, ja që mungoi analiza, ja që shqiptarët u kompleksuan me përplasjen e qytetërimeve, nuk kuptuan asgjë nga lufta në Siri, dhe u deshtë të futet Putini në Ukrainë për të kuptuar se pas Luftës së Ftohtë, lufta do të bëhet në mes të shteteve dhe jo vetëm në mes të kulturave, dhe se ekstremizmi islamik nuk është kërcënimi kryesor në botë, pavarësisht se e thotë njeriu që i ka shërbyer Presidentit Carter dhe na vulos në “The Clash of Civilizations“!

Lufta në Ukrainë, gishti kokës në Kosovë

Kur ngecën integrimet evropiane fillimisht në Shqipëri e më vonë edhe në Kosovë, askush nuk i vuri gishtin kokës për të gjetur arsyet e vërteta, por u mjaftuan duke ju referuar Huntigtonit me përplasjen e qytetërimeve.

Por ja që as këtë përplasje të Huntigonit, shqiptarët nuk e studiuan ndonëse kanë dy Akademi të Shkencave, në Tiranë dhe Prishtinë!

Ndryshe, do ta kishin kuptuar se sikur të vlente kjo përplasje e civilizimeve, sipas ndarjes që i bënte Huntigtoni, dhe vërtetë Ukraina do të ishte “shtet i ndarë” me pjesë që i takojnë civilizimeve të ndryshme, ku njëra është me Perëndimin dhe tjetra me botën ortodokse, në Kosovë e më pas edhe në Maqedoni, ndër pjesëtarë të UÇK-së do të kishim edhe ukrainas properëndimor.

Por, jo, si në Kosovë, ashtu dhe Maqedoni, madje te kjo e fundit edhe hapur në nivel shtetëror, u inkuadrua bota ortodkse, dhe Ukraina doli hapur me ushtarët e saj dhe pajisje ushtarake në Maqedoni, në luftë të hapur kundër Perëndimit që mbështeste shqiptarët!

Por, shqiptarët tashmë ishin të kompleksuar si musliman, Huntigoni e kishte bërë punën e vet dhe i kot ishte angazhimi amerikanë që bënte vijat ndarëse mbi ose nën Haraçinë, me autobus ose autoblinda.

Ky kompleksim që në masë të madhe, jo vetëm që i pengoi në studimin e këtyre luftërave dhe proceset integruese, por e dëmtoj botën shqiptare duke e kanalizuar mbi baza fetare, i hapi një shteg klasës së dështuar politike që ta përdor si kartë për mosarritjet e qëllimeve kombëtare shqiptare.

Shqiptarët u bindën nga kjo klasë e dështuar politike, se BE nuk i liberalizon vizat në Kosovë sepse janë musliman duke vënë paralele me Turqinë duke harruar se  kemi të bëjmë me një Perandori, dhe asgjë nuk bëri që të ndryshojnë mendim edhe pas luftërave në Afganistan, Irak e Siri, kur në Gjermani çdo i katërti qytetar rezident nuk është gjerman!

Dhe, kur themi Gjermani kemi thënë BE!

Në këto rrethana vjen dhe futet dhe Putini në Ukrainë, jo me qëllimin për ti treguar Huntigtonit dhe shqiptarëve që e besuan, se nuk ka Ukrainë perëndimore dhe ortodokse, dhe të gjithë atyre ëndërrimtarëve se lufta bëhet për ekonomi, por me kalimin e ditëve të luftës u qartësua se çështja e sigurisë dhe rreziku i Rusisë nga NATO ishin dokërra!

Pra, ja që edhe pas Luftës së Ftohtë, lufta po bëhet në mes të shteteve dhe jo në mes të kulturave, dhe ekstremizmi islamik nuk është kërcënimi kryesor as për Putinin dhe as për botën.

Putini kur u nis drejt Kievit e kishte parasysh Sheshin Majdan për të cilin kishin luftuar Perandoria Osmane dhe ajo e Austro-Hungarisë, dhe nuk ishte nisur në një konflikt me tensione kulturore.  

Sikur të ishte rrezik NATO, Putini do ti kthente asqerët e tij nga Moska në momentin kur Presidenti i Ukrainës, Zelensky, hoqi dorë nga anëtarësimi në NATO!

Sikur të vlente përplasja e qytetërimeve, Perëndimi do ta ndihmonte Ukrainën por nuk do të bënte nga ana tjetër biznes me Rusinë e Putinit duke u arsyetuar me vartësinë energjetike!

Dhe, sikur të vlente pjesa e botës ortodokse në Ukrainë, Putini do të kishte minimumin e respektit që të mos i bëjë shkrumb e hi edhe zonat e banuara me prorus, prej të cilave u zhvendosen mbi 1 milion prej tyre po nga sulmet ruse!

Sot, kur Kosova është me dy milionë banorë dhe çdo ditë po shpopullohet, realiteti në Ukrainë duhet ti shërbej që të shkompleksohet mbi përkatësinë fetare të atyre që anëtarësohen në BE dhe NATO.

Nafta dhe gazi rus nuk kanë përkatësi fetare dhe janë ato që iu deshtën dhe i duhen Perëndimit, për të cilat shqiptarët panë dhe luftëra në Lindjen e Mesme dhe së fundi Ukrainë!

Po shqiptarët, kanë diçka më shumë se Serbia ndaj së cilës janë kompleksuar me krishtërimin?!

Po, dhe kjo është dhuratë e Zotit që shqiptarëve që jetojnë në Ballkan, ju garanton përveç se mirëqenie edhe siguri: Mbi 400 kilometra vijë bregdetare; Dhe, pavarësisht sa mundohet ta hap Vuçiçi përmes Ramës, Ballkanin, Shqipëria mbetet e shqiptarëve!

Dhe, shqiptarët, duhet të kthehen nga Brukseli jo se aty është civilizimi, por është e ardhmja e tyre. Putini në Ukrainë e kristalizoi fatin e Kosovës në NATO dhe BE, pa ëndërra dhe teori, duke mos harruar se si në Bashkimin Evropian ashtu dhe Aleancën Veriatlantike ka dhe do të ketë përplasje qytetërimesh edhe pse janë brenda një familje ushtarako-politike, ka dhe do të ketë si Samuel ashtu dhe Huntington me toritë e tyre si mbi islamin ashtu dhe qytetërimin!/Revista Shenja/