Lija e majmunit në Serbi, Tirana zyrtare pret turistë serbë dhe hesht!
Në Serbi regjistrohet rasti i parë me lijën e majmunit. Instituti i Shëndetit Publik “Batut” i ka bërë apel qytetarëve që të zbatojnë të gjitha masat parandaluese dhe të respektojnë rekomandimet e institucioneve shëndetësore, se si transmetohet lija e majmunit dhe si të mbrohen.
Ndërkohë ekspertët janë angazhuar në një fushatë sensibiliuese pas shfaqjes së këtij infeksioni që thuhet se është i importuar ndërsa institucionet e Shqipërisë që presin turistë nga Serbia vazhdojnë të heshtin!
Epidemiologu i Entit për Shëndetin Publik në Beograd, Dr. Ivana Begoviç Lazareviç tha se në shumicën e rasteve të prekurve nga lija e majmunit, periudha e inkubacionit është prej 6 deri në 13 ditë e ndodhë edhe deri në 21 ditë.
“Fillon me ethet, temperaturë të lartë, lodhje, dhimbje në kurriz, dhe 1 deri në 5 ditë fillojnë të shfaqen puçrra që më vonë fillojnë të fryhen dhe qelbëzohen. Ndryshimet ngjajnë tek të sëmurët nga lija e ujit,” sqaron Dr.Lazareviç duke shtuar se përveç rrugës seksuale, lija e majmunit transmetohet edhe përmes rrugëve respiratore dhe përdorimit të rrobave që i ka pasur i infektuari.
Deri sa imunologu dhe profesori i Fakultetit të Mjekësisë në Beograd, Milosh Markoviç, sqaron se në masë të madhe janë të mbrojtur ata që dikur janë vaksinuar kundër lijës dhe fruthit.
“Ekzistojnë vaksina kundër gjeneratës së dytë dhe të tretë, nuk janë për përdorim masiv, por nëse lind nevoja mund të reagojmë,” tha Prof.Dr.Markoviç ndërsa institucionet shqiptare që propagandojnë “Ballkanin e Hapur” dhe turistët serbë në bregdetin shqiptar vazhdojnë të heshtin.
Ndryshe, Instituti i Shëndetit Publik “Batut” ka bërë të ditur se në Serbi është regjistruar rasti i parë i lijës së majmunit i cili është importuar. Rasti është diagnostifukuar dhe i është dhënë terapia e duhur, thuhet në faqen zyrtare të Institutit të Shëndetit Publik “Batut”.
