“Mos harro kurrë”, Berisha: Tirana sot është vasale e Serbisë, si në vitin 1945!
“Eshtë situatë e njëjtë si në vitin 1944. Jemi kthyer po aq vasal ndaj Serbise sa ishim në ’45,” tha Kryetari i Partisë Demokratike, Sali Berisha, me rastin e promovimit të librit mbi geonocidin serb ndaj shqiptarëve nga viti 1844-1999, “Mos harro kurrë”, duke folur edhe për një faktor në këtë skenar, që është George Soros, ky sponsor i të gjitha projekteve antishqiptare.
“Ne mblidhemi sot me një ndjenjë turpi të madh. Tirana është sot në raport me atë çka është më anti shqiptare, është një Beograd i vogël. Shumë nga ju keni lexuar histori. Tirana e sotme është Tirana e 1945. Kurrë ndonjëherë atë që kanë bërë aradhat partizane shqiptarë në Kosovë nuk do të mund ta bënin aradhat partizane serbo-malazeze pa veprën anti kombëtare të shqiptarëve në Kosovë. Jugosllavia nuk ekzistonte, ekzistonte në letër. Ato gjurmë të njësive partizane të Kosovës nuk jetonin në Kosovë, por Kosova kishte një lëvizje nacionaliste. Divizionet shqiptare shkuan aty dhe u pritën me flamurin e bashkimit kombëtar, ndërsa ata shkuan me flamurin e bashkimit të vllazërimit me serbët. Ajo kulmoi me një genocid të tmerrshëm, masakrën e Tivarit. U vranë me mijëra në Mal të Zi, por qindra syresh u vranë edhe nga Kukësi deri në Shkodër, vetëm e vetëm se ishin nacionalistë shqiptarë,” tha Sali Berisha duke vlerësuar se sot se një hordhi shqiptarësh po mbështesin projektin e “Ballkanit të hapur” që asgjeson Kosovën.
“Sot jemi në të njëjtën situatë. Beogradi qeveriset nga një udhëheqës doktrinar në genocid. Vuçiç ka thënë në Parlament ‘për një serb do vrasim 100 myslymanë’. Tani në vend që Shqipëria të përdorë të gjithë forcën diplomatike të saj për ta dërguar në Hagë Vuçiçin, shndërrohet në avokat të tij në çdo takim, përfshi samitin e NATO-s. Në qoftë se ka një gjë që duhet të ndajë njeriun e qytetëruar nga njeriu primitive është qëndrimi ndaj genocidit. Çfarë ndryshimi ka udhëheqësi ynë në Tiranë me udhëheqësin e Beogradit? A nuk tha Ana Brnabiç të njëjtat fjalë që tha Rama për masakrat në Kosovë,” tha Kryetari i Partisë Demokratike, Sali Berisha, duke përfunduar:
“Në qoftë se në 1945 projekti ishte që Kosova është më e sigurt me Jugosllavinë, por edhe ne do shkojmë drejt saj me Titon sekretar të parë, çfarë po ndodh tani? Ballkani i Hapur është asgjësimi i shtetit të Kosovës.”
Ndërsa Drejtori i ekzekutiv i Institutit të Studimeve të Europës Juglindore, Prof.Ass.Dr.Enver Bytyçi, duke folur në promovimin e librit “Mos harro kurrë” genocidi serb ndaj shqiptarëve 1844-1999, me autor Prof.Dr.Nusret Pllana dhe Msc.Agim Aliçkaj, tha se Edi Rama me ushtrinë e tij të madhe të perversëve mediatikë na kërkon ne shqiptarëve të harrojmë se në Kosovë kishte genocid, të harrojmë vrasjen e Adem Jasharit me 56 anëtarët e familjes së tij.
“Një ushtri e madhe perversësh me pushtet politik e mediatik në Shqipëri dhe në rajon, përpiqen që ne shqiptarëve të na bëjnë kolektivisht të harrojmë të shkuarën, të harrojmë për shembull se para dy dekadave Serbia mobilizoi ushtrinë, policinë, paramilitarët për të asgjësuar tërësisht shqiptarët e Kosovës. Këta perversë na thonë harrojini masakrat, harroni eshtrat e shqiptarëve të zhdukur në brigjet e Danubit dhe Savës, harroni ata 1400 fëmijë të vegjël që u vranë barbarisht prej Milosheviçit dhe Ministrit të tij të propagandës, Aleksandër Vuçiç, thjesht se këta fëmijë ishin trashëgimtarë të shqiptarëve. Na thoni harroni mbi 20 mijë përdhunimet e tmerrshme të grave dhe vajzave shqiptare. Dyshja Tiranë –Beograd na kërkon ne shqiptarëve të harrojmë se në Kosovë kishte genocid, të harrojmë vrasjen e Adem Jasharit me 56 anëtarët e familjes së tij; të harrojmë vrasjen e Bajram Kelmendit dhe dy djemve të tij; vrasjen e Fehmi Aganit apo masakrën e Reçakut dhe qindra masakra të tjera ku janë përfshirë mbi 12 mijë viktima të pafajshme shqiptarësh,” tha Profesor Bytyçi duke përfunduar:
“Dueti Rama-Vuçiç e konsideron ‘rrëmujë ballkanike’ e jo gjenocid serb, djegien dhe shkatërrimin, asgjësimin e shqiptarëve në Kosovë kur ndërkohë gazetat gjermane të kohës shkruanin se “Peja i ngjan Hiroshimës!”
