NATO, 300.000 trupa në gatishmëri të lartë

Sekretari i Përgjithshëm i NATO-s, Jens Stoltenberg tha sot se Aleanca Ushtarake e Atlantikut Verior synon të rrisë ndjeshëm numrin e forcave në gatishmëri të lartë, në mbi 300.000 trupa nga 40.000 që janë aktualisht, si pjesë e rishikimit më të madh të mbrojtjes së aleancës që nga koha e Luftës së Ftohtë.

Stoltenberg, raporton RFE, konfirmoi gjithashtu se aleatët do të zgjerojnë dislokimet e trupave në vendet e NATO-s që janë më afër Rusisë.

Vendimet do të zyrtarizohen në Samitin historik të aleancës 30-anëtarëshe të NATO-s këtë javë në Madrid, i cili po mbahet nën hijen e luftës së Rusisë në Ukrainë.

“Ne do të transformojmë forcën e reagimit të NATO-s dhe do të rrisim numrin e forcave tona të gatishmërisë së lartë në mbi 300.000 trupa,” tha Stoltenberg.

Forca e Reagimit të NATO-s aktualisht kanë një kontingjent prej rreth 40.000 ushtarësh, marinarësh dhe personeli ajror.

Në Samitin e Madridit, raporton RFE, NATO do të ndryshojë gjithashtu qasjen e saj ndaj Rusisë, e cila në strategjinë e fundit të aleancës nga viti 2010 ishte ende e përshkruar si një partner strategjik.

“Ky nuk do të jetë rasti në konceptin strategjik që ne do të biem dakord në Madrid,” tha Stoltenberg duke përfunduar:

“Unë pres që aleatët të deklarojnë qartë se Rusia përbën një kërcënim të drejtpërdrejtë për sigurinë tonë, për vlerat tona, për rendin ndërkombëtar të bazuar në rregulla.”