Vettingu, Kryeministri Albin Kurti takim me Kryetarin e PDK-së, Memli Krasniqi
Pas opinionit të pranuar nga Komisioni i Venecias, Kryeministri i Kosovës, Albin Kurti, ka diskutuar për hapat e mëtejmë të këtij procesi me kryetarin e Partisë Demokratike të Kosovës, Memli Krasniqi.
“Së bashku me Ministren e Drejtësisë, znj.Albulena Haxhiu dhe Zëvendësministren znj.Nita Shala, Kryeministri Kurti foli për hapat e mëtejmë lidhur me këtë proces dhe rëndësinë e koordinimit të përbashkët,” thuhet në njoftimin e Qeveris së Kosovës duke shtuar se me qëllim të njoftimit të mëtejmë lidhur me këtë proces, koordinimit të përbashkët dhe përfshirjes së gjithë akterëve, Kryeministri Kurti u ka bërë ftesë krerëve të partive parlamentare të opozitës: Partisë Demokratike të Kosovës, Lidhjes Demokratike të Kosovës dhe Aleancës për Ardhmërinë e Kosovës.
Aleanca për Ardhmërinë e Kosovës ka konfirmuar takimin me Kryeministrin Kurti, ndërsa nga Lidhja Demokratike e Kosovës kanë deklaruar se do të japin kontributin e tyre në Parlamentin e Kosovës.
Ndryshe, Qeveria e Kosovës ka miratuar Koncept Dokumentin për zhvillimin e procesit të Vetingut në Sistemin e Drejtësisë, si dhe ka përgatitur draftin e amendamenteve kushtetuese dhe projektligjin për vetingun në sistemin e drejtësisë.
Duke pasur parasysh rëndësinë e këtij procesi, respektimin e standardeve evropiane, si dhe të drejtat e njeriut, Qeveria e Kosovës thekson se Ministria e Drejtësisë, kishte dërguar kërkesë në Komisionin e Venecias, me qëllim të dhënies së opinionit për Koncept Dokumentin për vetingun në sistemin e drejtësisë dhe draftin e amendamenteve kushtetuese.
Më datë 17 qershor 2022, Komisioni i Venecias ka miratuar Opinionin për Vetingun.
