Amnistia fiskale, Berisha: Akt me pasoja katastrofale për rendin, sigurinë dhe biznesin

Konferencën e përjavshme sot Kryetari i Partisë Demokratike, Sali Berisha e filloi me amnistinë fiskale duke e vlerësuar si një akt me pasoja katastrofale për rendin dhe sigurinë e biznesin në Shqipëri. 

Duke përshëndetur të gjitha reagimet brenda vendit dhe të huaja, të bëra kundër këtij akti, Berisha paralajmëroj qeverinë se amnistia e saj fiskale është një goditje shumë e rëndë për bizneset e ndershme, është një goditje shumë e rëndë për reputacionin e vendit, është një goditje shumë e rëndë për rendin dhe sigurinë në Shqipëri. 

“Nëse siç ka qëllim kryesor të legalizojë paratë e krimit, pasi ju e keni të qartë se nuk ka shqiptar të ndershëm i cili me punën shtesë që mund të bëjë, me punën e ndershme, qoftë edhe të paregjistruar, të mund të sigurojë 2 milionë euro kursime, është gjithçka që ka vetëm një synim që “çunat” të legalizojnë paratë e krimit dhe ne jemi kategorikisht kundër saj. 

Gjithashtu, me këtë proces nuk ka diskutim se Edi Rama dhe grupi i tij do të kenë një taksë veças nga ajo që kanë shpallur për shumicën e këtyre shumave të legalizuara. Ky është një shpërblim që njerëzit që merren me trafiqe kriminale nuk e meritojnë kurrë. Ky është shkelmimi i barazisë dhe parimeve të drejta të biznesit. Këtyre ua rrit taksat në 23%, atyre u thotë për paratë që keni e keni 7 apo 8%,” tha Sali Berisha duke kujtuar se ndër të gjitha reagimet, reagimi i KE është jashtëzakonisht i rëndësishëm meqë këto ditë shpresojmë të merret vendimi për hapjen e negociatave.

“Legalizimi i parave të krimit është vetëm një aspekt i veprimtarisë së kësaj qeverie. Ndërkohë, vjedhja vazhdon non stop. Vjedhja shënon, jo në rrafshin sasior, por në rrafshin cilësor, një rekord botëror të padëgjuar dhe të paparë. Këshilltari i ministres të ndërtimeve publike më të kushtueshme në Europë dhe në Botë, Belinda Balluku, i tenderave me 99.99%, një Berberi, rezulton se ka rritur fitimin e kompanisë së tij, duke e shitur dhe blerë atë në 4 muaj, 600 herë.

Çfarë dëshmon kjo? Kjo dëshmon se në këtë vend për shkak të sistemit korruptiv të instaluar nga Edi Rama dhe bashkëpunëtorët e tij, për shkak të funksionimit të kësaj qeverie si një grup apo organizatë e mirëfilltë kriminale, çdo lloj imagjinate, çdo lloj projekti që mund të imagjinohet, mund të shndërrohet në realitet pasi ligjet nuk ekzistojnë.

Në një kohë kur qytetarët shqiptarë blejnë naftën me çmimin që e blejnë gjermanët, me rrogat 7-8 herë më të larta se sa këta. Në një kohë kur qytetarët shqiptarë falë bordeve të Edi Ramës paguajnë për djathin, vajin, qumështin çmimet më të larta se mesatarja e BE, për shkak të bordeve komuniste, qeveritarët pasurohen jo me 1-2, por deri në 600 herë,” tha Kryetari i PD duke vlerësuar se të gjitha këto e bëjnë jetike shpëtimin e Shqipërisë nga kjo qeveri. 

“Fronti Opozitar i Shpëtimit të Shqipërisë do të punojë fort edhe gjatë verës për t’u përgatitur për betejën më të fuqishme ndaj këtij regjimi dhe shpëtimin e Shqipërisë prej tij. Unë gjej rastin të falënderoj mediat, gazetarët, ju këtu, por edhe kolegët tuaj të cilët bëjnë një punë me guxim të jashtëzakonshëm në denoncimin e përditshëm të aferave të pafundme të kësaj qeverie, të oligarkëve të saj, të ndarjes së parave të këtyre qeveritarëve me klientelën e tyre, duke shfrytëzuar të gjallë dhe të vdekur që s’kanë asnjë lidhje me aferat e tyre,” tha Kryetari i PD, Sali Berisha duke përfunduar:

“Nuk janë vetëm rastet e inceneratorëve, si rasti i Gjyste Serrmit, Gurakuqit, Hajdarit, rasti i Dervishit që është famoz, Edi Rama ka me ish-drejtorin e vet, bashkë me Veliajn, aferat korruptive më të paimagjinueshme. Merrni listën e punëve që ka kryer ky, nga stadiumi i Elbasanit, stadiumi tjetër, me radhë tek punët në rrugë dhe kudo. Pra, klientela dhe qeveria janë një në vjedhjen e qytetarëve shqiptarë. Shpëtimi i Shqipërisë prej tyre është absolutisht emergjencë kombëtare.” 

PYETJE-PËRGJIGJET me gazetarët në Konferencën e përjavshme:

Zoti Berisha ku e mbështesni ju akuzën tuaj për amnistinë fiskale, sepse kryeministri vetëm pak minuta më parë është shprehur se përjashtohen nga amnistia personat me të shkuar kriminale dhe objektet e OFL?

Sali Berisha: Personat më të shkrua kriminale? Po ai ka vendosur në krye të PS. Ai ka trafikantë,  vrasës ka kudo tani. Ai i quan burrë të mirë ata, s’ka koncept. Po ç’është OFL? OFL është lista që i jep Edi Rama policisë për t’i prerë gjobën. Më thuaj një rezultat të OPFL. Preku gjë pronat e klanit Xhafa, cilat prona. Klani Xhafa është i faktuar, por mund t’ju jap dhjetëra shembuj të tjerë. Ajo s’ka asnjë synim tjetër vetëm se legalizimin e parave të tyre. pastaj janë me qindra e qindra persona që janë marrë me trafiqe kriminale dhe nuk janë zbuluar, shumë e thjeshtë. Nuk mund ta bëjë Shqipëria këtë. Sepse nisim nga fakti, a ka mundësi një njeri me punë të thjeshtë dhe të ndershme po e quaj të ndershme sepse nuk është regjistruar, të bëjë një apo dy milionë euro. Kurrën e kurrës.

Mund të sigurojë një rrogë shtesë, mund të sigurojë dy rroga shtesë, po mblidhni sa bëjnë dy rroga dhe kaq. Ky e ka krejtësisht vetëm me krimin, pa asnjë diskutim. S’ka dyshime. Pse ka një reagim kaq të madh ndërkombëtar? Sepse agjencitë e zbatimit të ligjit të këtyre vendeve, informojnë qeveritë se ky do jetë një problem i madh për ta. Do jetë një inkurajim i madh për këto grupe klane kriminale për të vazhduar veprimtarinë e tyre. U pastruan komplet, fillojnë nga e para dhe një herë. Ndaj është një dëm shumë i madh që i bëhet Shqipërisë. Shkaku më kryesor që nuk na kanë hapur negociatat ka qenë krimi. Ka pasur dhe të tjerë por shkaku më kryesor ka qenë krimi. Ministri i drejtësisë nuk sjell në parlament marrëveshjen e ekstradimit të kërkuar nga vendet e BENELUX, sepse fluturojnë ministra në burgje, jo në Shqipëri por në BENELUX, pikërisht nga këta çunat që kanë punuar. Ku qëndron problemi? Problemi qëndron se midis atyre çunave që kishte Damiani në sallë. Damiani është shumëfishi i tyre. Damianit i del kushëriri tek Kepi i Stillos, është reale kjo. Është Damiani vetë, duke kapur ish pronarë duke blerë toka, është e faktuar. Si u bë ky Berberi, si u rrit pasuria 600 herë në hijen e ministres.

Tani ju lutem! Në rast se një bashkëpunëtori i imi do i ndodhte kjo, pa asnjë dyshim do përballej me ligjin. Mund ta bënte fshehtas një gjë të tillë, por ti si zyrtar je i detyruar ta çosh para ligjit. Çfarë bëri ministrja, e kishte në krah kudo. E ka lartësuar, nga këshilltar e ka bërë drejtor të entit kombëtar të ndërtimit të rrugëve, sepse aty bëhen pazaret më të mëdha, aty kilometri shkon nga 22 deri në 30 milion euro, rruga kushton maksimumi 2 deri në 2.5 milionë euro të tjerat ndahen mes qeveritarëve dhe klaneve të tyre. Është evidente. Tani do thoni ju që midis një djali që ka bërë dy milion me kanabis dhe berberit që ka vjedhur nga thesari i shtetit, natyrisht ky është dy herë më shumë kriminel. Kështu janë gjërat, duhet rrëzuar kjo qeveri që të bëhet drejtësia, prandaj dhe fronti për shpëtimin e Shqipërisë ka marrë përsipër këtë mision.

Ju thatë gjatë fjalës suaj se fronti për shpëtimin e Shqipërisë do të punojë dhe gjatë verës. Do të thotë kjo që do ketë protesta të tjera, apo do pritet vjeshta.

Sali Berisha: Kur thashë do punojmë, do punojmë se kemi punë për të bërë. Duhet të zgjerohemi dhe më shumë duhet të punojmë shumë në komunitet. Për t’u ndalur me qytetarët, dhe për t’u shpjeguar se këtë katastrofë ekonomikë që po përjetojmë, këto vështirësi po ui krijon vjedhja e qeverisë. Unë ua u thashë dje në parlament një skenar si i Sri Lankës i pret. Sepse është i njëjti mekanizëm i krijuar. Growth lab që funksionon nën drejtimin e Ricardo Hausman, paguhet sipas të dhënave nga taksapaguesit shqiptarë, tetë milionë në vit nëpërmjet George Sorrosit. Kjo do një verifikim po nuk e ka kundërshtuar kush këtë, dokumentet janë. Pra çfarë bën ai. Ai bën coverture-n ndërkombëtare,. Ai thotë “mrekullia e Edi Ramës më ujërat”.

Po çfarë mrekullie ka Edi Rama më ujërat ai e di. Ka bërë shkrime. Sepse është një ish guvernator i bankës së Argjentinës mik i Geroge Sorros, bashkëpunëtor i tij. A  ishte  Erjon Velia që e çoi eksperiencën e vjedhjes me incineratorët në Sri Lanka apo e solli nga andej këtu,  duhet hetuar. Po kush do e hetojë? SPAK-u është kapaku. A e morët vesh që i shkoi zonja Hajdari SPAK për të dëshmuar që skam asnjë dijeni në botë për milionat e vendosura në kuotën time. Ik i thanë, mos na ngatërro me qeverinë, s’kemi punë.

Kjo është e vërtetë, reale. Ndaj dhe këtu përgjigjen do e japin qytetarët. Normalisht përgjigjen duhet ta jepte drejtësia. Normalisht qeveria s’duhet të ishte Edi Rama që kur tha se ka firmosur në shkelje të ligjit. Si mund të firmosë kryeministri në shkelje të ligjit afera 420 milionë? Po vjedh vetë me thasë, kaq. 

Ju deklaruat pak ditë më parë në një emision televiziv se nuk i keni denoncuar aktet korruptive të para 2005-ës, sepse Fatos Nano kishte pranuar rrotacionin. Mos është ky një lloj paralajmërimi ndaj zotit Rama që nëse ai do të dorëzojë pushtetin, ju nuk do e denonconi atë?

Sali Berisha: Absolutisht jo, nuk ka asnjë lloj amnistie ndaj Edi Ramës. Por Fatos Nano kishte një histori, ishte burgosur në bazë të një dosje, të përgatitur nga faqja e parë tek e fundit nga qeveria e mëparshme e PS-së. 

Që ta përfundoj pyetjen. Cila është garancia, sepse njësoj siç akuzoni sot Edi Ramën, keni akuzuar në 2002-2003 Fatos Nanon?

Sali Berisha: Garancia është fjala ime e nderit. Fatos Nano e kishte këtë rrethanë, nuk është se nuk e kishte. Tani Fatos Nano nuk ishte Ramiz Alia. Në një aspekt ai ishte reformator i PS-së, dhe demokracia shqiptare e filloi jetën me arrestimin e kreut të opozitës. Nuk u arrestua pa baza, dosja ishte e PS-së, por ishte një fillim i vështirë, lideri i opozitës ishte në burg. Megjithatë në vitin 2005 Fatos Nano bëri një akt për tu përshëndetur, pasi kishte kontribuar në reformimin e vërtetë të PS-së.

Në kuptimin që PS, nga partia e një njeri që nga viti 1941 deri në atë moment, u shndërrua në një parti ku kryetari zgjidhej nga anëtarësia. Ai ishte një akt për tu vlerësuar, çdo hap demokratik në një forcë politike është në interes të vendit. U zgjodh kryetar pasi e larguan. 

Së dyti, u bënë zgjedhjet dha dorëheqjen edhe si kryetar partie dhe si kryeministër, pranoi rregullat dhe u largua. Tani a e amnistova unë Fatos Nanon. Nuk e amnistova, por unë nuk ndoqa aferat e tij. Amnistia është tjetër. Ndërsa Edi Ramës i kam kërkuar 100 herë që çdo akt dhe vendim (dhe ai i ka dërguar në mënyrë të përsëritur), që ti çojë atje ku duhet. Ligji i parë që do votohet është heqja e çdo ligji për kryeministrat, dhe ministrat. Përndryshe nuk e ndërpresim dot korrupsion.

Mund të vjedhë tani, pota dijë që ai që vjen mbrapa e ka rrugën e lirë ta çojë atje ku duhet. Me veprat penale që ka kryer Edi Rama me vjedhje, unë mendoj që ai justifikon para çdo trupi gjykues dënimet më të rënda që mund të ketë marrë ndonjëherë ndokush për korrupsion. 

Që nga momenti që qeveria hodhi për diskutim amnistinë fiskale, që të gjitha organizatat vendase dhe huaja janë kundër. Sot kryeministri i ka dhënë Dhomës Amerikane të Tregtisë dhe asaj gjermane, që me flamurin e vendeve partnere, përgatisin fletërrufe. Opozita përveç deklaratave kundër a ka menduar ndonjë veprim konkret, nëse kryeministri vazhdon të mos tërhiqet ndaj këtij projektligji?

Sali Berisha: Për momentin janë këto deklarata. Se çfarë qëndrimesh do të mbajmë në vazhdim, opozita do ta ndjekë problemin. Do të diskutojmë me grupet e interesit, biznesin dhe do ta ndjekim problemin. Kjo do të diskutohet me të gjitha grupet e interesit, që opozita të bëjë gjithçka për bllokimin e kësaj amnistie. 

Z.Berisha ju deklaruat se gjatë verës Fronti do të zgjerohet, po në drejtimin e jetës Parlamentare, dje pamë një incident mes jush dhe zonjës Felaj për të drejtën e fjalës për shkak të problemeve që ju keni në grupin parlamentar. Në shtator do të keni shumicën, një grup të ri parlamentar? Dhe lidhur me Avokatin e Popullit, a keni një kandidat që e mbështesni?

Sali Berisha: Ai Parlament është si repart i PS për mënyrën e drejtimit. Ai drejtohet çdo ditë duke shkelur rregulloren e tij dhe natyrisht traget kryesor i këtyre shkeljeve është Sali Berisha. Mua s’do më pengojë askush dhe asgjë që të përdor atë sallë për të denoncuar para shqiptarëve vjedhjet e tyre të papërmbajtshme, lidhjet e tyre shumë të rrezikshme me krimin, drogën dhe varfërimin e madh me çmimet të shqiptarëve.

Unë e thashë edhe dje, Edi Rama ndaloi votën në PS. Unë ju them ju, që kur nuk votonte PS, ka qenë një parti terroriste. Ka qenë terroriste Partia e Punës së Shqipërisë, sipas dokumenteve zyrtare dhe sipas pohimeve të eksponentëve të saj kryesor. Po, kemi kryer akte terroriste, janë të regjistruar me zë dhe transkript. Aty ku nuk hyn vota zhvillohet mafia, hyn terrori, hyn krimi, hyn droga, hyn çdo gjë. E kuptoni çfarë drame kombëtare është ky transformim i Partisë Socialiste. PS votonte nuk them se nuk votonte, me votë fitoi Fatos Nano dhe u bë kryetar i saj.

Tani ky hoqi votën. Emëroi njësoj si Enver Hoxha. A pasqyrohet kjo në Parlament? Shumë! Ata janë një grup skllevërish dhe ata janë të gatshëm të zbatojnë çdo urdhër. Kjo është e vërteta. Ndaj dhe situata kjo është në Parlament. Sigurisht që urat, dyert, janë të hapura për deputetët e PD. Dhe absolutisht janë konstante përpjekjet për të gjetur të gjitha rrugët e bashkëpunimit, sepse janë deputetë të një force politike dhe kanë misionin e tyre qëndrimin si opozitë.

Pra, që të gjithë pa përjashtim edhe me ata që kemi patur kundërshtitë më të mëdha, janë deputetë të PD. Lidhur me Avokatin e Popullit, mendimi im është se ai duhet të jetë njeri jo partiak, duhet të jetë njeri i cili ka dëshmuar me veprimtarinë e vet një pavarësi ndaj qeverive që ka patur vendi këto vite. 

Në fakt në Kuvend kemi parë se pas çdo debati ju përdorin dhe konfliktin ka brenda PD-së me zotin Bardhi dhe zotit Alibeaj. Ju po punoni që të gjeni gjuhë të përbashkët, apo e quani të mbyllur ciklin e bashkëpunimit në PD?

Sali Berisha: Jo nuk e quaj kurrë të mbyllur ciklin e bashkëpunimit. Sepse që të gjithë janë anëtarë të grupit parlamentar të PD-së, dhe kjo parti nuk përjashton, e kemi hequr nga statuti. Ato gafat e mëparshme të përjashtimit kanë marrë fundit në PD. Nga partia largohen vetëm ata që largohen vetë. Të tjerët janë aty, është dhe neni i fraksionit. Ligji është ligj për mua, unë jam njeri i ligjit. 

Zoti Berisha ju e keni parë protestën e shtatë korrikut si një reagim ndaj keqqeverisjes. Por kjo pjesëmarrje a ishte dhe një mesazh kundër ambasadores amerikane në Tiranë, që kulmuan kur i tregoi shqiptarëve barin nëse do ju ndjekin ju pas?

Sali Berisha: Tani unë mendoj se shkaqet më kryesore kanë qenë mbështetja për një opozitë të vërtetë, dhe dhimbja e pamerituar e qytetarëve shqiptarëve nga vjedhjet e qeveritarëve nga çmimet stratosferike etj. Ajo që mund të them unë, deklaratat të cilat synuan të zvogëlojnë mbështetjen ndaj Sali Berishës, nuk janë përfillur nga qytetarët shqiptarë.

Tani ambasadori i parë i SHBA-vë ne Shqipëri ka qenë një burrë shumë i zgjuar dhe me reputacion të vërtetë në vendin e tij, Bernstein. Ai shkruan: Shqiptarët janë miqtë tanë, na duan shumë por ata kanë një gjë. Kanë dëshirë që vendimet ti marrin vetë. Në kohë të mbretërisë kjo. Ai ka qenë një njohës i shkëlqyer i psikologjisë së shqiptarëve.