Video/ 100 vjetori i marrëdhënieve diplomatike, Biden: SHBA do të vazhdojë të qëndrojë pranë Shqipërisë!
Duke uruar shqiptarët në 100-vjetorin e vendosjes së marrëdhënieve diplomatike, Presidenti i SHBA, Joe Biden, siguroi shqiptarët se Shtetete e Bashkuara do të vazhdojnë që të qëndrojnë pranë Shqipërisë ndërsa vendi forcon institucionet demokratike, lufton korrupsionin dhe përmbushi udhëtimin për t’iu bashkuar BE.
“Dërgoj urimet më të përzemërta për miqësinë jetëgjatë të SHBA-ve, ndërsa festojmë 100-vjetorin e vendosjes së marrëdhënieve diplomatike mes vendeve tona. Kur SHBA-të mbrojtën pavarësinë e Shqipërisë pas Luftës së Parë Botërore u krijua një miqësi e përhershme e popujve tanë, një dashuri e përbashkët për lirinë dhe vlerat e demokracisë të cilat nuk u thyen kurrë edhe në dekadat e diktaturës,” shprehet Presidenti Biden duke përfunduar:
Në të ardhmen SHBA-të do të vazhdojnë që të qëndrojnë pranë Shqipërisë, ndërsa vendi forcon institucionet demokratike, lufton korrupsionin dhe përmbushi udhëtimin për t’iu bashkuar BE. Uroj që dy kombet të vazhdojnë të ndërtojnë gjithçka kemi arritur së bashku dhe të ofrojmë një të ardhme më shpresëdhënëse për fëmijët tanë.”
Ndërsa Kryeministri Edi Rama ende i pashëruar nga “sindromi Meta” injoroi prezencën e Presidentit të Republikës duke harruar se nuk është më Ilir Meta dhe fjalën e rastit në këtë ceremoni e filloi duke përshëndetur Ambasadoren Yuri Kim, për tu korigjuar më pas me arsyen e këtij eventi ndërsa për dashurinë që shqiptarët kanë për SHBA, meqë ky njeh ligjin që ndalon promovimin e diktaturës komuniste, tha se më së shumti merita ka diktatori Enver Hoxha.
“Nuk besoj se ndodh në një vend tjetër ku të gjithë të mblidhen me ambasadoren dhe të kremtojnë ditën kur kanë vendosur marrëdhëniet diplomatike. Por kjo nuk e bën qesharake këtë që ndodh këtu në vendin tonë sepse ndryshe nga vendet e tjera, në këtë marrëdhënie ka hyrë në mes një histori e pangjashme me asgjë tjetër që ka përcaktuar këtë nivel.
Ne sot jemi këtu për 100 vjetorin sepse pikërisht si sot 100 vite më parë, në ministrinë e jashtme mbërriti dokumenti zyrtar që njoftonte qeverinë shqiptare se SHBA e njihnin shtetin tonë,” tha Edi Rama pa e zënë në gojë atë që drejtonte Ministrinë e Jashtme në atë kohë dhe që firmosi këtë akt historik.
“Por në fakt nuk është një 100 vjetor që vjen pas një miqësie të lumtur, por pas një historie që është përcaktuese në këtë marrëdhënie sot, historia e ndarjes me dhunë të shqiptarëve nga bota dhe shkëputja e marrëdhënieve me SHBA-në.
Në njëfarë mënyre, Enver Hoxha është njeriu që ka punuar më shumë se të tërë për këtë ditë, për dashurinë e shqiptarëve drejt SHBA-së. Ka punuar më shumë se gjysmë shekulli për t’i kthyer shqiptarët në dashnorët më të epur të SHBA-së,” tha Kryeministri Edi Rama duke përfunduar:
“Të gjitha ato që bëri për t’i larguar nga SHBA u përkhtyen në kalimin e shqiptarëve në ekstremin tjetër.”
Ndryshe, Marrëdhëniet diplomatike Shqipëri-SHBA janë vendosur më 28 korrik 1922.
Ambasadori i parë amerikan në Tiranë ishte Ulysses Grant Smith, i cili e nisi misionin diplomatik më 4 dhjetor 1922.
Ndërsa Ambasadori i parë shqiptar në Washington ishte Faik Konica, i cili u emërua në këtë detyrë në vitin 1929 nga Ahmet Zogu.
