Rusia financon disa parti në Maqedoninë e Veriut

Presidenti i Maqedonisë së Veriut, Stevo Pendarovski sërish ka akuzuar Rusinë se po ndërhynë në punët e brendshme të vendit që drejton, duke shtuar se ka të dhëna që po financon dhe disa nga partitë politike.

“Të gjitha institucionet shtetërore e dinë që Rusia po ndërhynë në punët tona të brendshme. Për herë të fundit me pjesëmarrjen intensive të njerëzve të saj, partive të saj politike, instalacioneve ruse. Nga fqinjët po vijnë njerëz që janë agjent rus, përkatësisht njerëz të shërbimit rus,” tha Pendarovski në një intervistë për të përjavshmen maqedone Fokus.

Ai tha se nuk mund ta zbulojë se nga vijnë saktësisht, sepse, siç tha, kemi të bëjmë me informacione sensitive, mirëpo rusët po bëjnë përpjekje të ndikojnë edhe përmes këtyre kërcënimeve serioze, të ashtuquajtura hibride, përmes propagandës politike.

Sipas Pendarovskit, organet kompetente kanë informacione mbi njerëzit që kanë ardhur që të nxisin provokime në protestat e fundit qytetare si dhe për financimin e disa partive politike. Ai nuk deshi të flas për kë është fjala, por theksoi se janë disa entitete që janë direkt të lidhura me Moskën, në disa vitet e fundit.

“Përderisa kjo politikisht është artikuluar në institucione, kjo është në rregull dhe është demokratike. Por, më duhet të them se vërtetë është e çuditshme që disa ditë pas pushtimit rus të Ukrainës, ‘E Majta’ (partia e Dimitri Apasijevit) e thirri ambasadorin rus në Parlament dhe e dekoroi për kontributin e tij në marrëdhëniet dypalëshe, që nuk ka precedent. Kjo nuk ka ndodhur në asnjë parlament evropian,” tha Presidenti i Maqedonisë Veriut.   

Në fund, nuk harroi pa theksuar deklaratën e fundit të shefit të diplomacisë ruse se “qëndrimi i popullit maqedon është në kundërshtim me kursin euroatlantik të elitës politike”, që sipas Presidentit të Maqedonisë së Veriut, Stevo Pendarovski, është deklaratë provokuese që bënë pjesë në propagandën politike.