A shkoi Rusia te Lulzim Basha?! Përgjigjen e jep…
Lulzim Basha nuk shkoi te Rusia, kjo edhe mund të jetë e vërtetë aq sa nuk shkoi mali te Muhamedi, por, sot, kur gjithçka po mundohet të kanalizohet te një lobim prej 500 mijë dollarësh, janë shumë rastësi që na çojnë në rrugën e Rusisë drejt Lulzim Bashës! Përgjigjen e saktë mund ta jep vetëm një njeri!
Sot kur demokratët janë të lodhur me sulmet intensive 30 vjeçare të Sigurimit të Shtetit dhe janë në rrezik që të ngelin edhe pa partinë e tyre të zemrës pluraliste, rrëfimeve “autentike” të Sigurimit se Sali Berishën ua solli Ramiz Alia, por jo dhe Lulzim Bashën, sepse atë e solli ai që ka faj nga viti 1992, Sali Berisha, iu vu kapaku nga shërbimet inteligjente amerikane me konstatimin e një hetimi se në vitin 2017, PD u financua me 500 mijë dollarë nga Rusia!
Përpëlitjet e fundit të Sigurimit të Shtetit për të shpëtuar Lulzim Bashën, i cili ishte kryetar i PD në kohën për të cilën flet raporti i shërbimeve inteligjente amerikane, me teorinë e “rastësisë” më nuk pinë ujë; Janë shumë rastësi dhe lidhje me rusët që nuk kanë më enigma pse shkoi Rusia te Lulzim Basha!
Fillimisht duhet sqaruar se askush nuk thotë se Lulzim Basha është spiun, por këtë dëshirë ai e ka shprehur vetë te libri “Misioni im”!
Lulzim Basha thotë se ishte frymëzuar nga burri i tezës, Sylejman Krasniqi! Kur ke idhull bashkëpunëtorin e Sigurimit të Shtetit, logjikisht e ke mendjen të bëhesh mjek, tornitor apo profesioni që ka idhulli yt, spiun!
Ky argument do ta përndjek Lulzim Bashën gjatë gjithë karrierës së tij edhe pse ai mendoi se i kaloi me lehtësi të gjitha barrierat kur i shpëtoi drejtësisë me Rrugën e Kombit; Sepse, zbulimi i fundit i mikut të Edi Ramës dhe bashkëpunëtorit të Agron Nezës, shefit të kundërzbulimit në FBI, Charles McGonigal, i vë kapak edhe historisë së Lulit të pastër si qelibari sepse Saliu e komandonte!
Në vitin 1999, kur Saliu nuk e komandonte por ai punonte si faktmbledhës pranë Gjykatës Ndërkombëtare të Hagës për Ish- Jugosllavinë, Lulzim Basha mori nga Milaim Bellanica një video-dëshmi mbi trajtimin çnjerëzor të popullsisë civile në Kosovë nga ushtria serbe në Krushë të Madhe të Rahovecit, të cilën, sipas dëshmitarit, vetë e kishte xhiruar.
“Lulzim Basha është prezantuar që unë jam punëtor i gjyqit të Hagës, këtë dëshmi më mirë të ruhen te ne sesa ti, dhe unë atë besim e kisha se ata e ruajnë më mirë, nuk e mendova se do e manipulojë. Një herë jam takuar drejtpërsëdrejti me të, dy herët e tjera as nuk më kanë lejuar që të hyjë në zyrën e tij. Kur e kam takuar më ka thënë ‘Po’, e thirri Raxhën, vjen Raxha ta jep kasetën dhe je i lirë, as s’më njeh as të njoh, dhe pastaj as më ka thirr asgjë,” thotë Bellanica për video-dëshminë e një masakre ku u vranë 243 persona dhe u humb nga Lulzim Basha dhe kurrë nuk përfundoi në Hagë; Lulzim Basha dhe ekipi i tij i bashkëpunëtorëve nuk dhanë përgjigje serioze në këtë akuzë por e relativizuan për kohën që u transmetua në mediat shqiptare, si një mjet propagandistik për të sulmuar kreun e Partisë Demokratike!
Ky arsyetim edhe mund të ishte rastësi, por, në Kosovën e stërmbushur me varreza masive, pse duhet të zhdukej një dëshmi krimi lufte në zonën ku kontrollohej nga ushtria ruse që ishte në kuadër të KFOR-it!
Pra, rus me Lulzim Bashën edhe kur nuk ka dollarë!
Rusët ikën nga Kosova dhe pas dekretit të Vladimir Putinit çuditërisht iku dhe Lulzim Basha edhe pse punonte në Departamentin e Drejtësisë në Administratës Ndërkombëtare.
Më 5 Maj të vitit 2003, Presidenti i Rusisë, Vladimir Putin, dekreton tërheqjen e 650 ushtarëve rus nga Kosova dhe 320 nga Bosnje Hercegovina, dhe në gusht të po këtij viti rusët braktisën Ballkanin ndërsa Shefi i Shtabit të Përgjithshëm të Ushtrisë së Rusisë, Gjenerali Anatolij Kvashnin, kishte një shpjegim të çuditshëm:
“Rusia nuk ka më interesa strategjike në Ballkan!”
Sikur me këtë togfjalësh të shoqërohej edhe qetësia në Ballkan, ky arsyetim edhe mund të kishte kuptim, por, pa u bërë viti filluan trazirat në Kosovë.
Pa rus në Kosovë nuk qëndroi as Lulzim Basha por u rikthye në Tiranë. Itinerari i karrierës së tij është i çuditshëm për faktin se aty ku shkelte ishin projekte amerikane që mund ti interesonin askujt më shumë se Rusisë; Dhe, kjo u konfirmua nga janari i vitit 2004 kur shkeli në Partinë Demokratike në Tiranë.
Komiteti i Orientimit të Politikave, KOP, ishte risi e PD që synonte fitore në zgjedhjet e vitit 2005, por, risi më e madhe ishte zgjedhja në krye të KOP-it e një njeriu të panjohur i cili do të koordinonte shumë nga figurat publike pjesë të këtij Komiteti, dhe, quhej, Lulzim Basha.
Në maj të po këtij viti, ky njeri enigmatik për demokratët por jo për Sigurimin dhe rusët, u bë anëtar i Kryesisë së PD dhe me fitoren në zgjedhjet parlamentare të PD në vitin 2005, u bë ministër i Punëve Publike, Transportit dhe Telekomunikacionit. Firma e parë antiamerikane që hodhi Lulzim Basha ishte anulimi i projektit i hekurudhës Tiranë-Rinas-Durrës i kompanisë General Electrik që ishte miratuar nga Qeveria Nano.
Arsyetimi që u anulua sepse nuk kishte leverdi nuk qëndron, sepse nëse nuk kishte leverdi një projekt i firmosur nga Qeveria Nano ishte ai i Albtelecomit, i cili përveç se i korruptuar kishte dhe rëndësi të madhe strategjike meqë Turqisë iu dhanë të gjitha burimet e komunikimit; Por, këtu Lulzim Basha nuk mund të shkelte mbi një fakt shumë të rëndësishëm, aleatin rus të Ankarasë!
Pra, rus me Lulzim Bashën edhe kur nuk ka dollarë sepse ato i kishte marrë Arben Ahmetaj!
Por, përveç këtij anulimi në radhë ishte fillimi i projektit më madhor pas shpalljes së pavarësisë, Rruga e Kombit, në krye të cilës ishte ministri Lulzim Basha.
Pse nuk iu dha ndërtimi i tërë i kësaj rruge kompanisë amerikano-turke “Bechtel Enka” këtë më së miri e din Lulzim Basha por që ajo të mos ndërtohej ose të paktën të zvarritej, më e interesuara ishte Rusia.
Kështu “Bechtel Enka” mori 66 kilometra nga i gjithë projekti i cili u nda në shumë lote që morën kompani të ndryshme, dhe vetëm një që ishte kosovare u refuzua; Se sa do të kishte ndikuar në cilësinë dhe shpejtësinë e ndërtimit sikur Bechtel të ishte ndërtuesi i vetëm, shqiptarët e kuptuan kur kjo kompani ndërtoi pjesën e Rrugës së Kombit në Kosovë!
Për të humbur gjurmët e gjithë këtij marifeti ekonomiko-politik rus u stis procedimi penal për Lulzim Bashën, “dëshmi” të dala nga ministria që drejtonte vetë Basha e që iu servirën socialistëve për të shpërqëndruar vëmendjen te dëmi ekonomik ose vjedhja, siç gumëzhinin komunistët të mbi 200 milionë eurove!
Dhe, çuditërisht ndërsa në mars u regjistrua nga Prokuroria e Tiranës procedimi penal ndaj Lulzim Bashës, në maj të po këtij viti ai emërohet ministër i Punëve të Jashtme! Sot Lulzim Basha mburret se çoi përpara proceset e anëtarësimit të Shqipërisë në NATO por vetëm pas një muaji në këtë post ai pret Presidentin e SHBA, George W. Bush në vizitën historike të shtetit shqiptar.
Pra, vizitë që ishte vënë në sitë nga shërbimet sekrete amerikane, por që askush nuk e përjashtonte dhe sitën ruse; Sot kjo sitë ruse me Lulzim Bashën edhe ka kuptim, aq më shumë kur nuk ka gjurmë për dollarë!
Pas zgjedhjeve të vitit 2009, Lulzim Bashën e gjejmë në krye të ministrisë së Punëve të Brendshme, ku përveç zbatimit të kritereve për liberalizimin e vizave, vuri gishtin dhe në lëshimin e pasaportave biometrike të sigurisë së lartë. Sërish antiamerikanizmi i Lulzim Bashës tashmë me kompaninë franceze “Sagem Securite”. Sipas një raporti sekret të muajit korrik 2007, të hartuar e paraqitur prej Misionit Europian “PAMECA”, mësohet se ishte sugjeruar që firma ”Sagem” të mos pranohet në tenderin e koncesionit të prodhimit e shpërndarjes së pasaportave dhe kartave, dhe kur debati rreth fituesit të tenderit ishte në kulmin e tij meqë do jepeshin të dhënat e qytetarëve shqiptarë një kompanie të akuzuar për krime dhe korrupsion ndërkohë që ishte refuzuar ajo gjermane që sugjerohej nga aleatët “Bunders Druckerei”, historia u mbyll me ardhjen e ministrit Lulzim Basha ndonëse dosja ishte dorëzuar edhe në Ambasadën e SHBA.
Vjen dhe viti i errët 2011 për Shqipërinë dhe Lulzim Bashën si ministër i Brendshëm. Të gjithë e kujtojnë protestën e dhunshme të 21 Janarit të vitit 2011 ku mbetën të vrarë 4 persona, vrasje për të cilat u akuzua si gjithmonë Sali Berisha, edhe pse në çatinë e ministrisë po qëndronte Lulzim Basha me dylbi në dorë! U hodhën një lum me akuza nga Partia Socialiste për vrasësin Sali Berisha, dhe po nga ata thuhej se Lulzim Basha nuk e kishte idenë; Dhe, përveç vrasjes së 4 protestuesve askush nuk e kuptoi se çfarë po kërkonte ministri i Brendshëm në çatinë e ministrisë dhe poshtë po dërmoheshin me hu nga protestuesit, policët e pajisur deri në dhëmbë pikërisht për protesta ndërsa Kryeministri ishte në zyrë.
Qershia mbi tortë është ardhja e Lulzim Bashës në krye të PD në vitin 2013! Sali Berisha, ndonëse ishte akuzuar për 30 vjet se ishte një i ardhur në krye të kësaj partie nga bolsheviku më i madh shqiptar, Ramiz Alia, nuk u sqarua se kush i dha kompetencën Saliut të veproj si ardhacak kur ende frymonin njerëzit më të rëndësishëm të Sigurimit të Shtetit dhe ata që shkatërruan dosjet e kësaj bande kriminale!
Sot, kur u konfirmua se Rusia ka investuar në Partinë Demokratike kur kryetar ishte Lulzim Basha, kur miku i Edi Ramës në krye të FBI, Charles McGonigal, kishte lidhje me Rusinë, na del tashmë jorastësisht se bashkëpuntor i McGonigal është Agron Neza.
Pse nuk është rastësi! Lulzim Basha mund ti gris faqet e librit “Misioni im” ku thotë se frymëzim kishte burrin e tezës, Sylejman Krasniqin, por nuk e fshinë dot historinë e idhullit të tij, bashkëpunëtor i Sigurimit të Shtetit.
Meqë nuk e fshinë dot historinë e karrierës së Sylejman Krasniqit, Lulzim Basha duhet ta dijë se libri i tij “Qielli i përflakur” nuk tregon vetëm se Sylejmani kishte vajtur në Tropojë me leje krijuese, por, se miku i tij ishte Bajram Neza ose më saktë babai i Agronit!
Për të treguar kush është Bajram Neza nuk mjafton vetëm historia e PPSH, Sigurimit të Shtetit dhe krimet e tij, sepse është histori që shtrihet nga Beogradi në Gramsh; Por, mjafton për të gjetur fijen e lëmshit rus ndër shalët e Lulzim Bashës!
Fije e cila mund të çoj deri tek anuluesi i projektit të General Electrik, pengimi i Bechtel-Encas për të marrë ndërtimin e Rrugës së Kombit, shfaqjes nga asgjëja për të pritur Presidentin Bush, dhënies së francezëve të “Sagemit” të dhënat e qytetarëve shqiptarë përmes pasaportës biometrike, marrjes së fronit të kryetarit të PD, dhe, ndoshta edhe vrasësi i Sokol Olldashit!
Për të zbuluar gjithë katrahurë shqiptare ku Saliu gjithmonë kishte faj, mjafton vetëm kujtesa e vetë Saliut që të bëjë publike fillimet e këtij lëmshi:
Kush e solli në zyrën e Kryetarit të Partisë Demokratike njeriun që, sot, bazuar në raportet e shërbimit të inteligjencës amerikane, ishte kryetar i PD në vitin 2017, dhe përdorë paratë e Moskës!
Këtij njeriu dhe Lulzim Bashës mund ti bëhen hallall nga demokratët 500 mijë dollarët e lobimit, por, kurrë, ama kurrë, kutërbimi bolshevizëm që sot mbanë Partia Demokratike dhe gjaku i derdhur më 8 Janar 2022, për hir të ëndrrës së një të çmenduri që të bëhet bashkëpunëtor i Sigurimit të Shtetit!
