El Clasico pa fitues/ Gola, spektakël, nervozizëm, kartona…
El Clasico përfundoi pa fitues, 2-2. Barcelona dhe Real Madrid u përballën në Camp Nou në derbin e 238 në histori, një takim që dhuroi spektakël, nervozizëm dhe kartona.
Në stadium ishin 97.939 shikues, që krijuan atmosferë drithëruese. Një ndeshje e fortë, me 4 gola por edhe me tensione në fushë, një karton i kuq në fund të pjesës së parë, kur futbollisti Sergi Roberto i Barcelonës u përjashtua nga loja.
Në 15 minutat e para realizohen dy gola! Në minutën e 10-të, Luis Suarez me një goditje të fortë shkundi portën e Navasit të Realit, 1:0. Nuk kaluan as 5 minuta, kur pas assist të Karim Benzema-s, Cristiano Ronaldo nga afërsia nuk e pati të vështirë ta shtyj topin në rrjetë, 1:1. Situata u tensionua në pesë minutat e fundit të pjesë së parë, kur gjyqtari tregoi kartona të verdhë për Sergio Ramos, Luis Suarez e Lionel Messin.
Në pjesën e dytë, Barcelona edhe pse me një futbollist me pak kaloi në epërsi falë magjisë së futbollistit më të mirë në botë, Lionel Messi. Ai nga distanca mbi 14 metra gjuajti bukur dhe e mposhti Navasin, 2:1. Në fakt, një derbi i madh, por si për Barcelonën, ashtu edhe për Realin, pikët nuk ishin të domosdoshme, kur dihet se katalunasit ka kohë që e kanë siguruar titullin e kampionit, kurse Reali ka përforcuar vendin e tretë.
Në minutën e 72-të, Gareth Bale barazoi rezultatin 2:2, duke e tensionuar edhe më shumë atmosferën në aspektin sportiv.
Barcelona është në krye të tabelës me 87 pikë, kurse Real mban vendin e tretë me 72 sosh pas 36 javë në Kampionatin e Spanjës. Barcelona mbetet pa humbje për 36 javë, ka një ndeshje me pak, regjistron 26 fitore e 9 barazime, rekord i ri në kampionatin spanjoll.
