Donald Trump shpall kandidaturën për president të SHBA në 2024

Ish-presidenti i Shteteve të Bashkuara, Donald Trump, shpalli zyrtarisht kandidaturën e tij për zgjedhjet presidenciale në vitin 2024.

Ish-presidenti Donald Trump tha se do të zhvillojë një fushatë të tretë për në Shtëpinë e Bardhë, duke nisur një fillim të hershëm të garës për zgjedhjet e vitit 2024.

“Për ta bërë Amerikën të madhe dhe të lavdishme përsëri, unë sonte po shpall kandidaturën time për president të Shteteve të Bashkuara”, tha zoti Trump para një auditori prej disa qindra mbështetësish, anëtarësh të klubit dhe shtypit të mbledhur në një sallë me llambadar në klubin e tij Mar-a-Lago, ku ai qëndroi i rrethuar nga më shumë se 30 flamuj amerikanë dhe pankarta që mbanin sloganin e tij “Ta bëjmë Amerikën sërish madhështore”.

“Unë jam duke kandiduar sepse besoj se bota ende nuk e ka parë se sa madhështore vërtetë mund të jetë ky vend. Ne përsëri do ta vendosim Amerikën të parën,” tha Ish-Presidenti Trump i cili në pjesën më të madhe të fjalës së tij u shmang të akuzoj disa personalitete për të cilat foli në tubimet e kaluara, por kritikoi mandatin presidencial të Baidenit ndërsa renditi sukseset e tij si president ndërsa shtoi:

“Para dy viteve Ne ishim komb i madh, dhe shumë shpejtë do jemi përsëri!”

Ndryshe, Ish-Presidenti Donald Trump vazhdon të jetë popullor ndër votuesit republikanë. Mirëpo, republikani i dytë dhe Ish-Zv/Presidenti, Mike Pence, gjithashtu ka ndërmarrë hapa drejt fushatës presidenciale, dhe konsiderohet konkurrencë serioze për Trumpin.

Zhvillimi i një tjetër fushate për Shtëpinë e Bardhë, është një kthesë e jashtëzakonshme për çdo ish-president. Vetëm një president në historinë e Amerikës është zgjedhur në dy mandate jo të njëpasnjëshme: Grover Cleveland në vitin 1884 dhe në vitin 1892./VOA/