Sondazhi, 23% e shqiptarëve do të pushojnë jashtë vendit për festat e Nëntorit

Ngritja e Flamurit, Pavarësia dhe Çlirimi i vendit, janë festa kombëtare megjithatë shifrat tregojnë se një pjesë e shqiptarëve pritet që ti kalojnë pushimet jashtë vendit siç, por pjesa më e madhe do të lëvizin brenda vendin, ose nuk kanë asnjë plan.

Këtë Nëntor, pushimet e shqiptarëve do të jenë ekonomike dhe për shumë pak ditë. Nga krahu tjetër, sondazhi tregon se familjet që tradicionalisht planifikojnë çdo vit pushime, do ti bëjnë ato edhe këtë vit, pavarësisht kostos së rritur.

Për më shumë se 10 ditë, “Monitor” vuri në dispozicion të lexuesve të saj, një sondazh për të kuptuar së ku dhe sa do të shpenzojnë shqiptarët gjatë festave të Nëntorit.

Pas përpunimit të të dhënave arritëm në përfundimin se 23% e shqiptarëve do të pushojnë jashtë vendit, 35% do të pushojnë brenda vendit dhe 42% nuk do të bëjnë fare pushime . Pas rritjes së nivelit të përgjithshëm të çmimeve, pushimet mbeten “produkt luksi” edhe për këtë vit.

Për të kuptuar më shumë, “Monitor” shtroi për lexuesit tre pyetje kryesore: Ku do të pushoni gjatë festave të 28-29 Nëntorit?  Sa planifikoni të shpenzoni gjithsej për pushime gjatë ditëve 26-30 Nëntor? Në cilin shtet do të qëndroni gjatë këtyre ditëve?

Nga ky kombinim rezulton se 42% e personave nuk të pushojnë fare gjatë festave. Prej totalit, 40% e individëve kanë 0 lekë buxhet për datat 26-30 Nëntor.

Kategoria e individëve që do të bëje pushime patriotike janë përgjigjur se gjatë  fundjavës do të harxhojnë nga 10.000-60.000 lekë.

Sondazhi tregon se 23% e personave të anketuar që do të pushojnë jashtë vendit.

Për këta, shpenzimet për katër ditë, variojnë nga 30.000 lekë deri në më shumë se 200.000 lekë.  Individët me të ardhura më të larta preferojnë që ti kalojnë pushimet jashtë Shqipërisë, për shkak të shërbimit dhe kushteve më të mira.

Tendenca për të udhëtuar ashtë u konstatua dhe nga ecuria e çmimeve të biletave të avionëve, të cilat për datat 26-29 nëntor janë shumë më të shtrenjta se në ditët e tjera, deri në 400 euro vajtje-ardhje, duke treguar për një kërkesë të lartë për fluturime.

Edhe për këtë vit, shqiptarët mbeten besnikë të Italisë si destinacioni kryesor për atraksionet turistike që ofron por edhe për shkak të lidhjeve familjare dhe shqiptarëve të tjerë që jetojnë në këto zona.

Së bashku me Turqinë, Greqinë, Kosovën dhe Malin e Zi, këto vende mbeten tradicionalisht destinacionet e pushimeve për shqiptarët, duke qënë më pranë, më shpejt të aksesueshme por edhe më ekonomike.

Për individët me të ardhura të larta të cilët përballojnë edhe pushime më luksoze vendqëndrimet e përzgjedhura kanë qenë Mbretëria e Bashkuar, Spanja apo Franca.

Në sondazh morën pjesë 200 persona nga të gjitha qytetin e Shqipërisë si: Tirana, Durrësi, Elbasani, Shkodra, Lezha, Vlora, Korça etj./Monitor/