Nëna Mbretëreshë Geraldinë, na fal!

Në krye të herës të kërkoj falje në emër të pak shqiptarëve të vërtetë që kanë mbetur në këtë botë, që nuk po arrijmë të garantojmë që të prehesh në paqe.

Nëna Mbretëreshë, lejuam që kjo rracë e poshtër komuniste të përdhosë kortezhin kur ti ndërrove jetë në tetorin e vitit 2002. Trupin tënd të pajetë e trajtuan ashtu si çdo ditë të therorësisë tënde për kombin shqiptarë. Dhe jo vetëm kaq!

Nëna Mbretëreshë, unë kot që flas, por më duhet të kërkoj falje në rrespekt të personalitetit tënd, therorësisë që ke bërë për kombin shqiptar dhe pamundësisë për të mbrojtur personalitetin tënd në përjetësi. Por ja që fati na solli kolerën e zezë në pragun e shtëpisë dhe trashëgimtarja Juaj, nuk po damkos vetëm Familjen Mbretërore por edhe emrin tënd të artë.

Në takimin tim të parë me ju Nëna Mbretëreshë Geraldinë, unë isha i mpirë duke Ju dëgjuar, por ju më thatë një fjalë të madhe që e fiksova: “Nuk është e lehtë kur je komb i vogël edhe pse e kemi zemrën e madhe!”

“E kemi!” Më fole si shqiptare me zemër të madhe, jo si Konteshë, sociologe e historiane e Zvicrës. Jo si këto fundërrina që janë të gatshëm të shesin gjithçka dhe të përdhosin të gjitha që nuk janë të kuqe.

Po e nderuar Nëna Mbretëreshë nuk është e lehtë të jeshë komb i vogël me pisa kaq të mëdhenj nëpër këmbë, që Teatrin Kombëtar e bëjnë gërmadhë, e Piramidën e atij kriminelit Enver Hoxha e ruajnë me kujtimet e rrëshkitjes, për ta rikonceptuar, siç thotë pasardhësja e Juaj, Princesha Elia. Si? E di që është krim, por Nëna Mbretëreshë unë them se vetëm ata nuk janë fajtorë. Jo, jo, nuk janë…

Në ditën kur u publikua se kush do të jetë pasardhësja e juaj apo bashkëshortja e nipit tuaj, Princit Leka, kam dëgjuar shumë rrëfime mbi komplotet e sigurimsave që vazhdojnë ti bëjnë Familjes Mbretërore. Pra, që i caktuan nipit tuaj edhe gruan, siç bënë për më shumë se 50 vjet gjatë luftës për pushtet dhe regjimit kriminal që gëzuan, duke përcaktuar gjithë familjen kriminale që do të qeverisë këtë “komb të vogël me zemër të madhe”. I kam dëgjuar edhe nga gojët e intelektualëve të shumtë shqiptar, por që të gjitha i kam hedhur në koshin e thashethemeve pa e menduar se edhe mund të jetë e vërtetë.

Kur u publikua firma e Princeshës Elia në listën e aktorëve që mbështesin shembjen e Tetarit Kombëtar, prap i qëndrova stoik mendimit të parë dhe e arsyetova me ndikimin familjar, i cili nuk është asgjë më shumë se një ndikim ekstremisht i kuq, i aktorëve që kontribuan në propagandën komuniste. Erwin Piscator kështu e sqaron në veprën e tij të madhe  “Teatri politik”:

“Detyra jonë nuk është të vendosim veprat nga mjedisi proletar në stilin natyralist.  Nuk mund ta kthejmë zhvillimin në pikën e nisjes para 50 viteve (…) Qëllimi jonë është heqja e teatrit qytetar (…) Ne luftojmë për formën e re të teatrit, formën e re të zbatuar vetëm në linjën e ndryshimit radikal shoqëror.” (“Teatri politik”, 1985, 182).

Por Princesha Elia, e nderuar Nëna Mbretëreshë nuk u ndalë me idetë e saj të kuqe. Është për shembjen e Teatrit Kombëtar, por thotë se nuk është për shembjen e Piramidës. Është për ta bërë gërmadhë Teatrin Kombëtar, por jo për ta shembur gërmadhën, pra, Piramidën.

“Në kohën e debatit të ashpër për prishjen e piramidës, unë ndjeja keqardhje për të gjitha herët që si fëmijë rrëshkisja në faqet e saj të mermerta. i përkas një brezi që nuk e lidh godinën me motivacionet fillestare të ndërtimit. Edhe sot kur e shoh pyes veten përse të mos rikonceptohet kjo ndërtesë si një qendër Pompidou, ku artistët bashkëkohorë të shprehen në forma alternative, të organizohen ekspozita, performanca, të ketë një bibliotekë të integruar etj,” thekson Princesha Elia që është edhe pasardhësja e Juaj, Nëna Mbretëreshë.

Ç’është e vërteta ajo e pranon se nipi Juaj, Princi Leka, nuk ishte dakord me mendimin e saj, por nuk e pranon që për hirë të rrespektit ndaj Familjes Mbretërore dhe trajtimit makabër që i është bërë nga Enver Hoxha, ajo mund të mos e adhuroj Mbretërinë por nuk ka se pse e e shprehë dashurinë ndaj Enverit. Përrallat me Pompidou dhe rikonceptimin e Piramidës janë të frikshme, qofshin ato edhe diskutime demokratike, siç thotë Princesha, “në familjen tonë ka demokraci”.

Për ata që nuk kanë qenë në Qendrën Pompidou (Centre national d’art et de culture Georges-Pompidou, CNAC), thuhet se qendra ka marrë emrin sipas Georgesu Pompidouu, i cili gjatë mandatit të tij inicoi idenë e ndërtimit të qendrës.

Nesër për Piramidën e rikonceptuar duhet të thuhet me rastin e çdo prezantimi se është ndërtuar me vendim të Byros Politike, pas vdekjes së Enver Hoxhës, e cila… dhe është rikonceptuar me inicimin e kryeministrit Edi Rama.

Për ta ruajtur vendin ku rrëshkiste Princesha, me rastin e rikonceptimit, minimumi ai duhet ta ruaj qëllimin bazë të ndërtimit duke dhënë dëshmitë mbi krimet e Enver Hoxhës ndaj shqiptarëve dhe Familjes Mbretërore.

Po, kjo ka kuptim, por nëse duhet ciceroni me qindëra herë në ditë tu thotë vizitorëve që domosdoshmërisht do të jenë nxënësit e shkollave, me urdhër të kryeministrit të Princeshës Elia, se ky ishte një muze për nderë të udhëheqësit Enver Hoxha, i cili u rikonceptua me urdhër të bllabllablla atëherë Partia e arriti qëllimin. Për ata që e mendojnë  se pjesa e prezantimit ku përmendet Enver Hoxha mund të shmanget, e kanë gabim, sepse pyetja nga vizitorët do të jetë e pashmangshme në momentin kur tregohet se kur është ndërtuar dhe kur erdhi në pushtet “I madhi Edi Rama”.

Në fund, Nëna Mbretëreshë Geraldinë, unë sot nuk mund të them se nipin tënd, Princin Leka e kanë martuar sigurimsat e kuq, por një gjë është e sigurt, ky çift bashkëshortor nuk mund ta përfaqësoj dhe mbrojë denjësisht Familjen Mbretërore Shqiptare e cila ngriti themelet e një shteti modern, demokratik dhe perëndimorë.