Rama dhe Thaçi në inaugurimin e Erdoganit

Kryeministri i Shqipërisë, Edia Rama dhe Presidenti i Kosovës, Hashim Thaçi, pritet të jetë në mesin e 22 burrështetasve tjerë që do të marrin pjesë sot në Ankara, në inaugurimin e Rexhep Tajip Erdoganit, në mandatin e tij të dytë si president i Turqisë, raporton agjencia turke e lajmeve Anadolu duke cituar burime presidenciale.

Inaugurimi i Erdoganit do të mbahet në kompleksin presidencial në Ankara.Që në ditën e parë të mandatit të ri, Erdogan do t’i funksionalizojë edhe kompetencat e zgjeruara të presidentit të cilat i mori përmes një referendumi muaj më parë.

Në ceremoni, sipas Anadolu, do të marrin pjesë edhe zyrtarë të tjerë të lartë shtetesh si zëvendës presidentë, politikanë, burokratë e ministra nga vende të ndryshme.

Së pari, Erdogan do të betohet në parlament rreth orës 17:30. Pas betimit, ai do ta vizitojë mauzoleun Anitbakir të themeluesit të Republikës së Turqisë, Mustafa Kemal Ataturk.

Në orën 19:00, do të mbahet ceremonia e inaugurimit të Erdoganit në kompleksin presidencial.

Agjencia Anadolu ka publikuar edhe listën e shteteve të cilat do të përfaqësohen me presidentë.

Në këtë listë, përveç presidentit të Kosovës përmenden edhe presidentët e Bullgarisë, Gjeorgjisë, Moldavisë, Bosnjës e Hercegovinës, Serbisë, Pakistanit, Kirgistanit, Sudanit, Guinesë, Zambisë, Guinea Bisaut, Guinesë Ekuatoriale, Somalisë, Mauritanisë, Gabonit, Çadit, Xhibutit, Venezuelës, Republikës Turke të Qipros si dhe Emiri i Katarit.

Në ceremoni pritet të marrin pjesë edhe 28 kryeministra, kryetarë të kuvendeve e zyrtarë tjerë të shteteve të ndryshme përfshirë edhe sekretarin e përgjithshëm të OSBE-së dhe Komisionerin e BE-së për Emigracion dhe Punë të Brendshme.