Ukraina e gjeti zgjidhjen, Shqipëria jo!
nga Agim Popoci
Kur ikën Vladimir Putin, të gjitha institucionet ndalojnë. Diçka e ngjashme ndodhi në Bashkimin Sovjetik. Gjithçka ndaloi. Kështu u shpreh Presidenti i Ukrainës, Volodymyr Zelensky, në një emision të David Letterman’s ndërsa u pyet nëse “Putin ftohet dhe vdes, ose rastësisht bie nga dritarja dhe vdes, a do të vazhdoj lufta?”
Përkundër shkatërrimit të frikshëm të shteti ukrainas nga Vladimir Putin, presidenti ukrainas nuk është plotësisht i pashpresë sepse është i vetëdijshëm se një zgjidhje ekziston, ndërkohë në Shqipëri, gjithashtu e robëruar nga një autokrat, situata është e pashpresë por jo edhe pa zgjidhje!
E pashpresë sikur edhe të vdesë Edi Rama ose të bie nga dritarja!
Kjo u dëshmua dhe në 11 dhjetorin e fundit, në dy festat e ndarjes, ku 32 vjet pas rënies së diktaturës, skenari rrezikon të përsëritet!
Kur vdiq diktatori shqiptar Enver Hoxha, asgjë nuk ndaloi, por pushtetin e mori një kriminel po aq i devotshëm si për të vrarë shqiptar ashtu dhe për të bashkëpunuar me Beogradin, Ramiz Alia!
Në momentin kur pushteti komunist po jepte grahmat e fundit si ekonomike ashtu dhe politike, lëvizja studentore bëri hapin e duhur dhe të vetëm për të ndihmuar rënien e këtij regjimi të kalbur në gjak, i cili tashmë ishte edhe në rënie të lirë.
Sërish asgjë nuk ndaloi, as në vitin 1990!
Sigurimi i Shtetit nuk u dorëzua por u infiltrua ndër radhët e çdo lëvizje që po vlonte duke përfshirë deri ato studentore. Sigurimi ishte më aktiv se kurrë, krijoi një klimë ndër mijëra të përndjekur, familjet e tyre dhe të gjithë të internuarit, sikur ata nuk duan hakmarrje edhe pse ata ende nuk ishin shprehur!
Devijimi i itinerarit të protestave duke shmangur Bllokun e Tiranës për t’i ikur skenarit rumun, shfaqja e llumit të bllokut dhe jo vetëm në krye të lëvizjes studentore, dhe më pas Partisë Demokratike, si dhe në fund, epilogu i zgjedhjeve të para në sistemin pluralist, jo vetëm pse nxorën fitues Partinë e Punës që ishte për 45 vjet në një pushtet kriminal, dëshmoi se sa i fortë ishte Sigurimi i Shtetit edhe kur sistemi quhet pluralist.
Pakënaqësitë e mëdha shoqërore meqë asgjë s’kishte ndryshuar dhe ndërhyrjet nga jashtë, dhanë një rezultat ndryshe në zgjedhjet e radhës, që edhe pse u zhvilluan vetëm disa muaj më pas përmbysën sistemin, por, jo dhe Sigurimin e Shtetit!
U bënë operacione të shumta kirurgjikale politike edhe me Komisione të përçudnuara si ato Mezini dhe Bezhani, u përdorën dhe keqpërdorën si të përndjekurit politik ashtu dhe pronarët tashmë pa prona, por asgjë nuk ndryshoi në klasën politike.
Zyrtarisht njihej shumica dhe pakica politike, por në çdo sistem ashtu si ky aktual, shumicë absolute politike ishte dhe ngeli Sigurimit i Shtetit! Këtë e dëshmuan si viti 1997, ai 2013, 2017, 2021 dhe viti tashmë i tmerrshëm 2022 që po i jep fund shkatërrimit të opozitës dhe krijimit të një regjimi monist!
Në vitin e zi 1997, Sigurimi i Shtetit pasi i mblodhi shqiptarëve paratë që kishin nën dhe mbi kashtë, shkaktuan një rrëmujë që nuk e njeh historia shqiptare duke mos çarë kokën për numrin e viktimave; Sepse, në planin e tyre pasonte përmbyllja e vrasjeve dhe thithjeve publike të gjakut të zyrtarëve të shtetit shqiptar me një amnisti të përgjithshme, pasi komunistët erdhën në pushtet.
Konsolidimi i institucioneve të Shqipërisë së shkrumbuar la në plan të dytë konsolidimin e shqiptarëve në veçanti dy shtresat që prodhoi regjimi komunist, të përndjekurit politikë dhe pronarët pa prona, por jo që nuk u harruan për tu keqpërdorur!
Edhe në këto kalkulime, Sigurimi i Shtetit ishte i kujdesshëm! Shkërmoqja e Partisë Demokratike gjatë vitit të kaluar dhe vjellja e protagonistëve që iu përkushtuan luftës për selinë e partisë, tregoi se Sigurimi ishte në pushtet dhe i fortë edhe gjatë 13 viteve të pushtetit të PD, nga gjithsej 32 sa numëron pluralizmi.
Në vitin 2013, ndonëse korrupsioni dhe vjedhja kishte kalbur pushtetin demokrat, të gjithë e kishin të qartë se ikja e Ilir Metës nga koalicioni qeverisës me urdhër të Internacionales Socialiste, e la PD-në në opozitë!
Por, në vitin 2017, shumë pak demokratë e kuptuan se ishte Sigurimi i Shtetit ai i cili garantoi opozitën e Lulzim Bashës dhe pushtetin e Edi Ramës me një negociatë të vetme të 17 Majit! Ose, nuk deshën ta kuptojnë, siç ndodhi në vitin 2021!
Artikulimi i epilogut të zgjedhjeve të PD në vitin 2021 pas përçarjes që plasi kur filloi analiza e kësaj humbje, tregoi se ku flenë lepuri i Sigurimit!
Ndonëse rebelimi brenda PD iu atribua Sali Berishës, dhe nuk ishte hera e parë që fajin e kishte Saliu por tani ishte shpallur edhe “non grata” nga SHBA, artikulimi i rrethanave që u sqaruan nga Kryetari i PD, Lulzim Basha, treguan se cilat erëra e kishin sjellë Partinë Demokratike në këtë derexhe!
Deri në vitin 2021, asnjë demokrat nuk e ka fajësuar Sali Berishën se i futi zjarrin Shqipërisë në vitin 1997 ndonëse kishte zëra për tolerimet që i bëri firmave piramidale, dhe ndër demokratë njihej thjeshtë si kryengritje komuniste! Kryetari zyrtar i PD, Lulzim Basha, për herë të parë nga goja e një demokrati fajësoi Sali Berishën se i futi zjarrin Shqipërisë!
Për Gërdecin janë thurur shumë legjenda si për ditët kur ndodhi ashtu dhe mënyrën ndonëse rezultoi si një ngatërresë e thjeshtë shqiptaro-amerikane, por askush nuk fajësoi Sali Berishën si fajtorë për vdekjen e 26 personave në këtë fabrikë të paligjshme demontimi, e cila ishte ndërtuar në një zonë ushtarake pranë shtëpive, kujdes, të ndërtuara pa leje! Por, trimi Lulzim Basha fajësoi drejtëpërdrejtë Sali Berishën për vrasjen e 26 personave!
Dhe, 21 Janari 2013, njëri ndër protestat më të dhunshme kundër institucioneve shtetërore ku ngelën të vdekur 4 persona. Nën ose mbi zë, shqiptarët kanë dëgjuar për rolin e Sali Berishës në atë kohë, por, fjalën Lulzim e aq më pak Bash, nuk e kishte dëgjuar njeri rreth kësaj ngjarje edhe pse njerëzit që kishin qëlluar mbi këta fatkeq ishin nën drejtimin e Ministrit të Brendshëm, Lulzim Basha. Dhe, po ky ministër, në vitin 2021, nën petkun e kryetarit të PD, akuzoi Ish-Kryeministrin Sali Berisha për vrasjen e 4 personave dhe dhunën e përdorur më 21 Janar.
Gjithsesi, jo gjithçka ngeli lëmsh! Ai filloi të shpalosej, erdhi 8 Janari 2022, demokratët u rrahën nga policia e Edi Ramës me urdhër të Lulzim Bashës, dhe nuk ndodhi e kundërta, ashtu siç ishin akuzat në fuqi!
Erdhi 5 Marsi, dhe në zgjedhjet lokale u pa se as pushteti i Edi Ramës nuk ndihmon në qytetin ku Sigurimi nuk ngjyente dot, Shkodër. Asnjë deputet nuk mbështeti kandidatin e lëvizjes që u pagëzua “Foltore”, Bardh Spahia, por, ai u bë kryetar bashkie me votat demokrate.
Lulzim Basha iku për të lënë një mëkëmbës në fronin që i kishte premtuar Edi Rama, por, si ky grupim që Kryeministri me të drejtë e pagëzoi ”Gojorist” ashtu dhe “Foltoristët” nuk arritën të përbashkojnë në tërësi partinë që me shumë sukses e përçau Sigurimi i Shtetit, dhe zuri vend sërish në këto dy pjesë.
U bë shumë zhurmë nga “Gojoristët” si arritje e tyre për hapjen e dosjeve të Sigurimit të Shtetit, por takimi i parë lidhur me po këtë hapje tregoi se asgjë nuk kishte ndryshuar. Në krye të vendit ishte ulur një bashkëpunëtor i Sigurimit të Shtetit, Preç Zogaj! Normalisht, mori fjalën për të diskutuar, por asnjëri prej të përndjekurve politik që Sali Berishën e akuzojnë si komunist dhe janë radhitur në radhët e sigurimsave të Lulzim Bashës, nuk i tregoi me gisht se ku e ka vendin! Ai ngeli aty, në detyrë, “Çifteli”, ndërsa llumi mbylli gojën!
Protesta e 6 Dhjetorit të vitit 2022 me sulmin që iu bë Kryetarit të PD, Sali Berisha, krijoi në pamje të parë idenë se po hapet një kapitull i ri, por, jo, thjeshtë ishte një paralajmërim i Sigurimit të Shtetit, se kush kë po e ndiqte këmba këmbës!
Erdhi dhe dita e turpit, 11 dhjetor 2022, për të festuar ditën e ndarjes! Llumi i Lulzim Bashës organizoi në mesditë festën e 32 vjetorit të ekzistimit me mburrje për dukjen e tyre prej fukaraje duke harruar se janë parti e djathtë, dhe akuzuan pjesën tjetër se sa të veshur që ishin; Dhe, për këtë mirëmbajtje të look-ut, sipas kësaj kafshërie shqiptare, fajtorë ishin ish-drejtorët e Sali Berishës, pikërisht ashtu siç i akuzonte Edi Rama me opozitën e tij të vitit 2013!
Por, Sigurimi i Shtetit nuk fle edhe pse shpërfaqi një grup injorantësh që as rolin e shërbëtorit të Edi Ramës nuk e bëjnë siç duhet! Mbrëmja e 11 dhjetorit 2022 kishte një pritshmëri më të madhe duke pasur parasysh se kishim të bëjmë me shpresën e vetme të mbetur për kombin shqiptar!
Por, Jo! Procesi i shkatërrimi të PD nuk ka përfunduar. Mbrëmja filloi me bashkëpunëtorin e shpallur zyrtar të Sigurimit të Shtetit, Artan Hoxha! Askush nuk e kundërshtoi, Ish-Presidenti në tentativë përfundoi fjalën si i pari i kësaj mbrëmje që natyrisht duhet të ishte festive.
Si, Pse, fajin e ka apo nuk e ka Saliu, pak rëndësi ka, vetëm Sigurimi i Shtetit nuk ka faj sepse është aty për të shkatërruar një ndërtim pa lejen e tij!
Dhe, për shqiptarët që shohin ëndrra me sy hapur për 32 vjet, natyrisht se këto dy festa të ndarjes do harrohen ama jo dhe simbolika e tyre, aty ku mund ta gjejnë dhe zgjidhjen e vetme për shpëtim!
Enver Hoxha dhe Ramiz Alia kanë vdekur dhe situata është po ajo që ishte!
A do të vdes apo do të bie nga dritarja, pak rëndësi ka, por, Sigurimi i Shtetit nuk duhet të ekzistoj!
